CIA pillugu apeqquteqaat akineqarpoq
- USA nunat allat namminersorsinnaassusiannut ataqqinnippoq, tamannalu isumaqarpoq, USA-p danskit kalaallillu silaannakkut angallavii atornerlunnavianngikkai, danskit nunanut allanut ministeriat Per Stig Møller, nunarput sinnerlugu Folketingimi ilaasortap aappaata Kuupik Kleistip apeqquteqaataanut taama akissuteqarpoq.
Per Stig Møllerip assersuutigaa, angallanneqartut parnaarussaappata peqqarniisaarniaappataluunniit aqqummik atornerluisoqarnavianngitsoq, qalleqqissaarpaalu, tamanna uppernarsaatissaqanngitsoq.
Per Stig Møllerip aamma tunngavilersuutigaa Amerikamiut nunanut allanut ministeriata Condoleezza Ricep Europamut 2005-imi decemberimi tikeraarnermini oqarsimanera, tassa USA nunat allat nammineersinnaassusaannut ataqqinnittuusoq.
- Tamanna ima paasivara, danskit kalaallilluunniit silaannakkut angallaviinik timmisartoqarfiinilluunniit USA atuisarnianngitsoq. Tamannali nunat tamalaat isumaqatigiissutaannut naapertuutinngilaq, Per Stig Møller Kuupik Kleistimut ilaatigut taama akivoq.
Nunat tamalaat isumaqatigiissutaat naapertorlugu, USA-mi isortortumik paasiniaasartut CIA-t tigusaminnik ilaasoqarlutik Pituffimmut aqqusaartannginnissaanut malittarisassaqarnersoq aqqusaartarsimannginnissaannillu qularnaarinnittoqarsimanersoq, Kuupik Kleistip nunanut allanut ministerimut apeqquteqaatigaa.
Københavnimilu politiit suli paasiniarpaat, CIA tigusaminnik ilaasoqarluni Danmarkimi akunnittarsimanersoq kiisalu Pituffimmut aamma aqqusaartarsimanersoq.
