CIA peqqarniisaarniallu

novembarip 21-at 2005 15:09

Peqqarniisaarnianik tigusanik CIA-p timmisartukkut isertuussilluni nunarput qulaavaallugu angallassisarsimanera uppernarsarneqartoq, paasissutissat nutaat takutippaat.

USA-mi naalaagaaffiup isertortumik paasiniaasartuisa CIA-p paarnaarussassanik angallassisarsimaneri, nunatta qulaatigut pisarsimanissaa ilimanartoq, Danmarkimi angallannermut ministeri Flemming Hansen oqarpoq.

Canadami pisortat oqarput, Danmark aqqutigalugu nunarput qulaallugu timmisartunik marlunnik angalasoqartarsimasoq. Timmisartut nunatsinnik qulaassisimasut CIA-mit nakkutigineqartuupput.

Nunarput, Savalimmiut Danmarkilu qulaavaallugit CIA-p angallassisarsimanera pillugu, nunanut allanut ministeri Per Stig Møller, aqagu nunanut allanut ataatsimiisitaliamut nassuiaasinneqassaaq.

Tigusat peqqarniisaarniaasut timmisartumik angallanneqarnerini Kalaallit Nunaat Savalimmiut Danmarkillu silaannaasigut angallassisoqarsimanera

Naalagaaffiit isumaqatigiissutaannik unioqqutitsinerusoq, USA ilisimatinneqareeraluarpoq, taamaammat SF-t Socialdemokratillu paaserusuppaat qanoq ililluni taamatut pisoqarsimasinnaanera.

Peqqarniisaarnianik pasisat nunagisaaninngaanniit aallarunneqartarput, ilisimaneqarporlu killisiuisarnerni periaatsit sakkortuut atorneqartartut. Naalagaaffiup isertortumik paasiniaasartuisa, timmisartumik taamatut angallassisarnerit pisortatigoortumik akuerisimanngilaat.

Nunarput sinnerlugu folketingimut ilaasortaq Lars-Emil Johansen, Anders Fogh Rasmussen-mut saaffiginnissuteqarsimavoq, paasiniarlugu, taamatut pisoqalermat Kalaallit Nunaanni isumannaallisaanissaq anguniarlugu, Danmark qanoq iliorsimanersoq.

Apeqqut akineqarpat, Namminersornerullutik oqartussat qanoq iliuuseqarnissaat tullinnguutissasoq, Lars-Emil Johansen ritzau-mut oqarpoq.