CIA-p timmisartuutai ilimagisamit amerlanerupput

CIA-p timmisartuutaasa isertuussanik tigusanik ilaasoqarnerarneqartartut Danmarkimi timmisartoqarfimmut aqqusaartarsimanerat ilimagisamit sualunnerujussuusoq, danskit angallanneq pillugu ministerianit Flemming Hansenimit oqaatigineqarpoq.

Siusinnerusukkut oqaatigineqartarpoq CIA-p timmisartuutai 2001-imili Danmarkimut aqqusaartarsimasut. Flemming Hansenili tusarliussivoq inuit pisinnaatitaaffii pillugit suliniaqatigiiffiup Amnesty internationalimit nalunaarutigineqartoq piffissami tassanerpiaq CIA-p timmisartuutigigunagai 37-eriarlutik mittarsimasut.

Enhedlistemi oqaaseqartartoq Frank Aaen oqarpoq, paasissutissat nutaat takkuttut siullermik tusarliunneqartunut sanilliullugit qaffasinnerujussuunerat tupinnartuusoq.

- Timmisartut taakku Danmarkimut susaramik? Sooruna danskit naalakkersuisuisa tamanna qangali misissuiviginiarsimanngikkaat? Tamannami apeqquserneqarsimanngikkaluarpat tassa qatangiinnarneqarsimassagaluarpoq, Enhedslistemeersoq Frank Aaen oqarpoq.

Inuit pisinnaatitaaffii pillugit suliniaqatiiffik Amnesty International naapertorlugu tigusat pinerliiniaasorineqartut timmisartunullu ilaatinneqartut, nunaanniit aallaruteriarlugit nunanut naalliutsillugit killisiuisarfiusunut ingerlanneqartarsimanerarneqarput.

Nunatsinniit folketingimi ilaasortap Kuupik Kleistip nunarput aqqusaarlugu CIA-p timmisartuussisarneri apeqquteqaatigisareeraluarpaa, misissorneqarnissaali akuersaarneqarsimanngilaq.