CIA-p timmisartuussisarsimanerata misissuiffigineqarnissaa apeqquserpaat
Demokraatineersoq Justus Hansen ilaatigut ima oqarpoq:
- Ataatsimiititaliarsuarmik misissuisoqarnissaanik neriorsorneqariarluta maanna institut-imit misissorneqalernera aappaatigut nuannaarutigalugu aappaatigut iluarinngilara.
Justus Hansen oqarpoq. Taanna ataatsimiititaliami siulittaasuuvoq, KNR-imullu isummaminik annissinermini atatsimiititaliami ilaasortaannartut oqaaseqarluni Justus Hansenip ilisimatitsissutigaa. Taanna nangilluni ima oqarpoq:
- Misissuisoqarnissaanik isumaqatigiissut pitsaavallaanngilaq! Misissuisoqarnerani sooq Nunarput akileeqataassava? Tassa taanna iluarinngisara, Justus Hansen oqarpoq.
Siumup ataatsimiititaliami ilaasortaatitaa, Aleqa Hammond oqarpoq isumaqatigiinneq susaarnaveeqqutaasoq:
- Naalakkersuisoqarfinnut marlunnut DIIS-ip iserluni pappiliaatinik misissuinissaa periarfissaavoq alloriarnerusoq, Nunatsinniillu isigalugu susaarnaveeqqutaalluni. Danmarkip Naalakkersuisuisa misissuinissamut itigartitsivissortoqannginneranut tamanna aamma takussutaavoq, Aleqa Hammond oqarpoq.
Inuit Ataqatigiit ataatsimiititaliami ilaasortaa, Juliane Henningsen isumaqatigiissummut iluarisimaarinninneruvoq:
- Isumaqarpunga pitsaasuussoq misissuisoqarpat. Pissutigalugu nalugatsigu Danmarkip, USA-p Nunattalu akornanni pisuusaarnermik pisoqarsimanersoq imaluunniit tatigeqatigiinneq taakku akornanni innarlerneqarsimaneq, taamaattumik isumaqarpunga misissuinissaq pitsaasuusoq.
Inatsisartuni Nunanut Allanut Sillimaniarnermullu ataatsimiititaliaani siulittaasup tullia, Juliane Henningsen taama oqarpoq.