CIA-p timmisartuussisarneri pillugit nalunaarusiaq kinguaattoorpoq
Nunanut allanut naalakkersuisoq Aleqa Hammond, Danmarkimi nunanut allanut ministeri Per Stig Møller pingasunngormat ataatsimeeqatigereerlugu nassuiaavoq
- Neriussimangaluarpugut misissuititsinerup inernera asamut inuit aallakaannginneranni saqqummiunneqassasoq, kisianni paasinarsivoq itinerusumik paasiniaanissaq pisariaqarsimasoq, taamaattumik nalunaarusiaq septembarip aallartilaarnerani aatsaat piariissasoq oqaatigineqarpoq.
>Suleqatigiit sunaana nalunaarusiariniaraat?
- Ilumoornersoq qallunaat naalagaaffiata ilisimasimaneraa CIA isertortumik timmisartuussinerminut atatillugu silaannartatsinnik atuisarsimanersoq, aammalu ilumuuinnersoq qallunaat naalagaaffiata pissutsit tamakku ilisimasimanngikkai.
- Qallunaat naalagaaffiata pisussaaffigaa - Itillimi isumaqatigiissut aallaavigalugu - nunanut allanut tunngassuteqartunut, nunatsinni naalakkersuisut ilisimatissallugit.
- Aamma CIA-p tigusanik timmisartuussisarnera eqqarsaatigalugu oqallinneq tusagassiuutitigut ingerlanneqarsinnaanngilaq. Qallunaat pisussaaffigaat nunatsinnut ukiumoortumik nalunaarusiortarnissaq, taassumalu pingaaruteqassusaa erseqqissaassutigaarput, Aleqa Hammond oqarpoq.