CIA-p timmisartuussineri Sverigemi misissorneqarput

Taamani isertortumik paasiniaasartut SÄPO-meersut timmisartuni eqqiaasartuusaarlutik, tigusanik ilaasoqarnersoq misissorlugu timmisartumut ikipput. Taamatut aviisi Svenska Dagbladet allaaserisaqarpoq.

Timmisartoq Sverigemi mittarfimmut 2006-imi apriilip qaamataani minnialermat, CIA-miit tigusanik angallassisuunissaa Sverigemi naalakkersuisut pasitsaappaat.

Amerikamiut timmisartuat taanna, pisortatigoortumik inunnik nalinginnarnik angallassisutut nalunaarsorneqarsimavoq, tassa amerikamiut pisortatigoortumik angallassissunnerattut nalunaarsorneqarani.

Ulloq taanna timmisartoq mittussanngormat akisussaaffik Sverigemiut illersornissamut pisortaqarfiata tiguaa, timmisartuussinermullu kikkut akisussaanersut, ilaasullu namminneq piumasaminnik imaluunniit pinngitsaalisaallutik angallanneqarnersut ilaatigut apeqqutigalugu.

Illersornissamut pisortaqarfimmit aamma apeqqutigineqarpoq, ilaasut namminneq piumasarinngisaminnik angallanneqartut timmisartuunneqarnerminni pituttorneqarsimanersut, pisortaqarfimmullu sorlermorpiaq tunniunneqartussaanersut.

Taassumalu saniatigut amerikamiut paasitinneqarput, siunissami tigusanik angallassisut isornartoqarsinnaanerinik sukumiinerusumik misissuiffigineqartassasut. Taamatut aviisi ullut tamaasa saqqummertartoq Information allaaserisaqarpoq.

Aviisimi allaaserisat naapertorlugit, danskit kalaallillu silaannartaanni CIA-meersut isertortumik timmisartuussisarnerminni suut assartortarsimaneraat, Nunatsinnilu akunnittarsimaneri pillugit, danskit paasiniaasartui PET-meersut sukumiisumik paasiniaasarsimanersut ilisimaneqanngilaq.