CIA-p timmisartuinik apeqqusiisut amerliartorput

Kuupik Kleist aamma Atlantikup Avannaani Suleqatigiit Folketingimi kisimiinngillat CIA-p nunarput Danmarkilu qulaallugit isertortumik timmisartuussisoqartarnerarlugu misissueqqissaartoqarnissaanik piumasaqartut. Danmarkimi illuatungiliuttut tamarmik misissuisoqarnissaa aamma ilungersuutigilerpaat.

Oqaatigineqarpormi timmisartut CIA-p attartugai 2001-imiit 45-riarlutik danskit mittarfiinut aqqusaartarsimasut:

Takussutissalimmik uppernarsaatissaqanngilaq amerikamiut Danmarkimi inatsisinik unioqqutitsillutik iliuuseqartarsimanerannik. Pasilliinerli alliartuinnarpoq oqaatigineqarmat amerikamiut danskit mittarfiinut 45-riarlutik akunnittarsimasut. Siusinnerusukkut Danmarkimi angallannermut ministeri Flemming Hansen oqaraluarpoq amerikamiut taamaallaat arfineq-pingasoriarlutik akunnissimanerarlugit.

Lars Norman Jørgensenip Amnesty Internationalimeersup tamanna tupigusuutigaa.

- Qanorpiaq amerlassuseqarnerannik nalornineq ajornartorsiutaavoq. Tassami eqqartukkavut tassaapput inatsisinik unioqqutitsilluni timmisartuussinerit, inunnik naalliutsinneqarsimasunik parnaarussivinnit isertortuneersunit unioqqutitsilluni angallassinerit. Pisoq ilungersunartuummat isumaqarpugut Danmarkimi naalakkersuisut pisussaaffigigaat paasiniassallugu qanoq atsigisumik taamatut angallassisoqartarsimanersoq imaluunniit angallassisoqartarsimannginnersoq, Lars Norman Jørgensen, Amnesty Internationalimeersoq oqarpoq.

Paasissutissat nutaat tunngavigalugit Danmarkimi naalakkersuisunut illuatungiliuttut isumaqarput misissueqqissaartussamik ataatsimiititaliortoqartariaqartoq. Kisianni partiit naalakkersuisuutitaqartut Dansk Folkepartii peqatigalugu tamatumunnga akerliupput.

Morten Østergaard Radikale Venstreneersoq oqarpoq tamanna nuanniitsuusoq.

- Nunat ilaasa pissutsit tamakku isiginngitsuusaarusunneruaat, ajoqaarlu Danmarki taamatut isigineqalissappat. Pisoq ima ilungersunartigimmat piviusut paasisariaqarpavut, taamaassorinninnerit eqqoriaanerillu pinnagit. Piviusoq uatsinnut qanorluunniit nuanniitsigissagaluarpat, Morten Østergaard oqarpoq.

Sverigimi, Finlandimi Canadamilu Amerikamiut tigusanik unioqqutitsillutik angallassisarsimanerat siusinnerusukkut paasineqarmat, nunani pineqartuni naalakkersuisut akuleruttariaqarsimapput.

Amnesty Internationalimit aamma aviisimit New York Times-imit paasissutissat kingulliit naapertorlugit 2001-imiit timmisartut CIA-p attartugai 25-t missaanniittut nunatsinni mittarfinnut aqqusaartarsimapput – taakku saniatigut nunatta silaannartaatigut timmisartuussinerit amerlassusaat ilisimaneqanngitsut pisarsimassangatinneqarput.