CIA-p timmisartui Kalaallit Nunaanni?

Peqqarniisaarniat tigusarineqarsimasut U.S.A-p isertortukkat kilitsissiaqarfiata CIA-p angallassinerini Nu-natsinni mittarfiit akunniffigineqartarsimanerlutik?

Taama qallunaat inatsisartuinut ilaasortaq Kuupik Kleist danskit angallannermut ministeriannut apeqquteqarpoq.

Kuupik Kleist taama aperinerminut amerikamiut kilitsissiaqarfiata isertortumik tigusanik angallassisarsimaneri tunngavigaa.

Peqqarniisaarnianik tigusanik angallassisarsimanerit 2001-imiit ingerlanneqarsimaneragaapput.

Tigusanik angallassinerit, inuit pisinnaatitaaffiinik suliaqartut assigiinngitsut isornartorsiorpaat, tigusammi nunanut naalliutsitsinernut akuersaartunut ingerlanneqartarsimaneragaammata.

Assersuutitut taaneqarput nunat europap kangianiittut.

U.S.A-li taamaattoqannginneragaavoq.

Ilisimaneqalereerpoq København-ip mittarfia tamakkununnga atorneqarsimasoq, Danmark-illu silaannakkut angallannermi oqartussaaffeqarfigisaatigut timmisartunik qulaassisoqartarsimasoq.

Tamanna paasineqarpoq danskit inatsisartuini ilaasortat Enhedlistineersut apeqquteqarnerisigut.

Islandimissaaq tamannarpiaq piffissami kingullermi tusagassiutitigut uitsatigineqaqaaq. Paasissutissat tunngavigalugit amerikamiut kilitsissiaqarfiata CIA-p tigusanik angallassillutik Islandimi mittarfiit 67-eriarlutik miffigisarsimavaat.

Aviisimilu Visir-imi atuarneqarsinnaavoq aammattaaq Narsarsuaq Kangerlussuarlu akunniffiusarsimasut.

Timmisartut Learjet 35-inik taaguutillit, qulinik ilaasoqarsinnaasut angallassissutigineqarsorineqarput.

Orsussaasivii ulikkaarlugit km-t 3500-t akunninnatik ingerlaarsinnaapput. Islandimi mittarfimmit Keflavikimit U.S.A.-mi mittarfimmut qaninnerpaamut isorartussuseq uuttuuppoq, Nunarpullu kujaqqutisungarlugu timmiffissaq naannerpaavoq.

Taannali ingerlaffigisarsimagunikku orsuerutingajavillutik ornitaminnut apuuttarsimassapput.

Ilimatsaanneqarporlu akunneqqaartariaqartarsimassasut. Immaqa Nunatsinni.

Savalimmiormiuttaaq paaserusulerpaat tigusanik assartuinermi Savalimmiut qulaanneqartarsimanersut.