CIA-p timmisartua Norgemut Islandimullu nunnippoq

januaarip 15-at 2007 06:37

Timmisartoq, Amerikami naalagaaffeqatigiit isertortumik paasiniaasartuinit, CIA-mit, atorneqartartoq, Norgemi Solami Stavangerip timmisartoqarfianut ippassaq akunnippoq. Tassani orsersorpoq, minutsillu 45-t qaangiummata kingumut qangattarpoq, Islandimi Keflavikimut tamatumuuna ingerlaassalluni, Stavangerimi aviisi unnukkut saqqummersartoq, Stavanger Aftenblad allappoq.

Parnaarussat ilaasulluunniit nalinginnaasut issimasuunersut ilisimaneqanngilaq.

Ukioq 2005-imi juunip ulluisa aallaqqaataanni timmisartumik CIA-mut attuumassutilimmik Stavangerimut kingullermik sivikitsukullammik nunnittoqarpoq, timmisartoq taamani nunnittoq tassaalluni parnaarussanik issimasoqartartoq, MD-82.

MD-82-ip taama akunninnerata kingorna paasineqarpoq, USA-mi septembarip ulluisa aqqarnganni 2001-imi peqqarniisaartoqarnerata kingorna, CIA Europami, Kangiani Qiterlermi Asiallu qeqqani parnaarussanik unioqqutitsisumik untritilippassuariarluni angallassisarsimasoq.

Timmisartut parnaarussanik issimasullit Europamut nunneqqusaassanngitsut Eurpaparlamentimit aalajangerneqarnikuuvoq, tamannalu Norgemut soorunami aamma atuuppoq.