CIA-p parnaarussanik timmisartuussisarmanera misissorli

- Amerikamiut isertortumik paasiniaasartuisa CIA-t parnaarussaminnik timisartuussinerminni, Nunatsinnut Savalimmiunut Danmarkimullu aqqusaartarsimasinnaanerat pillugu misissuisussamik suleqatigiissitaliortoqarli. Taama siunnersuuteqarput Folketingimi nunarput sinnerlugu qinikkat Lars-Emil Johansen aamma Savalimmiunit qinigaasoq Høgni Hoydal.
januaarip 31-at 2007 13:59

Taakku siunnersuuteqarnerminni suleqatigaat partiit Enhedslistit, Socialdemokratit, radikalit Venstret, Socialistisk Folkepartiillu. Siunnersuut Folketingimi aqagu oqaluuserineqassaaq. Lars-Emil Johansen aperaarput, sooq taama siunnersuuteqarnersut:

- Paasissutissat 2004-miilli maannamut saqqummerartut assigiinngitsuusimapput, CIA-p parnaarussanik timmisartut atorlugit Afghanistanimit, Syriamit Marokkomit Egyptinimillu angallassinerannik imaqartut.

Paasissustissat tunngavigalugit Europarådi siornaak 2005-imi misisuisitsisimavoq, tassungalu Europaparlamenti akulerussimalluni.

- Maannamut paasisat najoqqutaralugit Danmarkimut 40 missaanni nunnigussisoqartarsimavoq, taavalu CIA timmisartui parnaarussanik angallassigunartut 30-nit amerlanerit nunatsinnut mittarsimapput. Taamatatumik ersarissumik paasisaqarasulluta suleqatigiit apeqquteqaapput tunngavigalugu oqillitsitsiniarpugut siunnersuutigalugulu kommisioniliortoqassasoq misissuisussamik, isumaqaratta erseqqisssumik paasisaqariaqartoq, Nunarput Savalimmiullu apeqqutip tungaatigut qanoq atorneqarnersut.

Lars-Emil Johansen oqarpoq misissuisoqassappat misissuinerup qanoq atorneqarnissaa nunatsinni Nalakkersuisunit isummerfigineqartariaqartoq.

CIA-p parnaarussaminik timmisartuussilluni Nunatsinnut Savalimmiunut Danmarkimullu aqqusaartarsimasinnaanera pillugu misissuisitsisoqarnissaanik, Folketingimi suleqatigiillutik siunnersuutertik akuerineqanngitsuussappat, oqaloqatigeeqqittariaqassallutik, Lars-Emil Johansen aamma oqarpoq.