CIA-p angallassisarsimaneranut misissuineq sivitsoriartuinnarpoq

Naalagaaffeqatigiit isertortumik paasiniaasartuisa, CIA-p, tigusanik danskit kalaallillu killeqarfiisa iluatigut angallassisarsimanerannut misissuisut inerniliinerat suli utaqqigallassavarput.
oktobarip 02-at 2008 11:51

Danmarkimi naalakkersuisut CIA-p angallassisarsimaneranik misissuinerat sivitsoriartuinnarpoq. Nunanut allanut ministeri Per Stig Møller januaarimi neriorsuigaluarpoq misissuinerit aasap tungaanut ingerlassasut. Aasarmalli Per Stig Møller oqarpoq misissugassat annertoqimmata Folketingi ukiaanerani aallartippat inerniliineq saqqummiunneqarsinnaassasoq. Folketingimili ataatsimiinerit marlungormat aallartimmata nunanut allanut ministeri oqarpoq ukiaanerani sulinngiffeqariitsianerani misissuinernit inerniliinerit saqqummiunneqarsinnaassasut.

Naalakkersuisut Dansk Folkepartii ikiortigalugu arlaannaannulluunniit attuumassuteqanngitsunik misissuisitsiniarneq itigartillugu ministerit pingasut misissuisippaat.

CIA-p tigusanik timmisartuussisarsimanera CIA-p atassuteqarfigisartagaa danskeq pillugu Danmarks Radiop januaarimi aallakaatitassiaani takutinneqareersorlu misissuisitsiniarneq piumasarineqalerpoq.

Europapalamentip nalunaarusiaani siornatigut atuarneqarsinnaareerpoq europami naalagaaffiit arlallit CIA-p tigusanik angallassilluni aqqusaartarsimagaat, tamannalu pisarsimasoq naalakkersuisut isertortumik akuersissuteqareernerisigut. Ukioq 2001-imiit 2005-ip tungaanut CIA 1245-riarluni tigusanik timmisartuussisarsimasoq.