CIA nunarput qulaallugu parnaarussanik timmisartuussisarnersoq misissorneqassanngilaq

Danskit inatsisinik atortitsinermut ministeriata Lene Espersenip CIA-p Savalimmiut nunarpullu qulaallugit paarnaarussanik timmisartuussilluni angallassisarneranik pasitsannerup misissuiffigineqarnissaanik noqaassuteqarneq itigartippaa.

Savalimmiormiut Folketingimi ilaasortaatitaata Høgni Hoydalip noqqaanera ippassaq itigartitsissutigineqarpoq. Itigartitsinerup saniatigut nunat tamat isumaqatigiissutaannik unioqqutitsisoqarsimaneranik Amnesty Internationalip nalunaarusiaanik ministeri tigusaqarsimanani oqarpoq.

CIA-p anngiortumik paarnaarussanik timmisartuussisarnerinik pasitsannerit Danmarkimi naalakkersuisut ilisimasaqarfigigaat Amnesty Internationalip nalunaarusiamini allassimavaa.

- Amnesty Internationalip inassuteqarneratut uanga nakkutilliisussaatitaanngilanga pasilliutillu tunngavissaqanngitsut annerusumik oqaaseqarfigerusunnagit, Inatsisinik atortitsinermut ministeri akissuteqarluni oqarpoq.

Amerikamiut nunanut allanut ministeria ippassaq oqarpoq, USA-p nunat allat namminersortuuneri ataqqigai, peqquserluttoqarsimaneranillu pasilliutissaqassalluni tunngavissaqartoqanngitsoq.

- Amerikamiut naalakkersuisuinit Danmarki qulaallugu timmisartortoqartarsimanngitsoq imaluunniit mittarfiit timmisartuussinermi atorneqarsimanngitsut uppernarsaatinik danskit naalakkersuisuisa allakkat tigusimasatik upperaat, inatsisinik atortitsinermut ministeri Høgni Hoydalimut akissuteqarluni taama oqarpoq.