CIA-imut tunngasoq suli akineqanngilaq
Naalakkersuisut siulittaasuata Kuupik Kleistip Danmarkimi nunanut allanut tunngasuni ministeri Lene Espersen, sapaatip akunnerata siuliuani ataatsimeeqatigaa. Oqaluuserisaasalu ilagaat CIA pillugu misissuinissamik kalaallit Naalakkersuisuisa Inatsisartullu Nunanut allanut tunngasuni sillimaniarnermullu ataatsimiititaliaata piumasaqaataat.
Danskit piumasaqaammut akissutaat allanngungilaq. Tassalu misissuisioqassanngilaq.
Akerlianilli Lene Espersen neqerooruteqarpoq.
- Nunanut allanut Ministerip neqeroorutigaa, nunatsinninngaaniit nammineq misissuinissaq kissaatigissagutsigu, taava taamaaliorsinnaasugut. Taamatullu paasissutissat toqqorsivinniittut tamarmik ammarneqarsinnaanissaat, aamma oqaatigaa, Kuupik Kleist oqarpoq.
Taamaappat taamak kissaateqarpisi?
- Aalajangersimasumik, tamanna suli aalajangiiffiginngilarput. Pissutigalugu misissuinissaq taamaattoq, nukippassuarnik piffissanillu, soorunami aamma aningaasanik naleqartussaammat. Nalilersorneqartussanut aamma ilaavoq, uagut nammineq misissuinermik ingerlatsissagutta, taava suna angussaneripput eqqarsaatigilluaqqaassavarput. Assersuutigalugu paasineqassagaluarpat, paasissutissat tamakkiisut uagutsinnut folketingimullu tunniunneqarsimanngitsut, taava tamatuma kingorna qanoq kinguneqartariaqarnera soorunalimi apeqqutinut ilaasariaqarpoq, Kuupik Kleist oqarpoq.
Uani unneqarissuseq, soorlumiuna akersuussutigineqartoq?
-Danskit Naalakkersuisui pasillerneqarput unneqqarissaarsimanngitsutut, amerikamiut sorsuffinni tigusaminnik angallassisarsimanerannut tunngasunik, Kuupik Kleist oqarpoq.
Folketinngimut ikioq manna qinersisoqartussaavoq, taamaalilluni maanna Danmarkimi Naalakkersuisuusut allannguuteqassappata tamanna Kalaallit Nunaannut CIA pillugu misissuinissamut kinguneqaratarsinnaavoq.
- Folketingimi massakkut illuatungiliuttuusut, Naalakkersuisunngortussatullu ilimagineqartut, manna tikillugu oqaatigiuarpaat namminneq Naalakkersuisuutitaqalissagaluarunik taava misissuititsinermik ingerlatsiniarlutik. Taava takussavarput ilumut, folketingimi naalakkersuisut allanngorumaarnersut. Aappaattullu Naalakkersuisut nikissappata, taava taamatut neriorsuineq eqquutinneqarumaarnersoq, Kuupik Kleist oqarpoq.
