CIA eqqartuussisulersuunneqarpoq

CIA-p tigusanik timmisartuussisarsimanera pillugu eqqartuussineq siulleq Italiami juunip arfineq-pingajuanni ingerlanneqartussanngorpoq.

USA Italialu aporaattussanngorput, tassa Milanomi eqqartuussisup Amerikamiut kilitsissiai CIA-meersut 26-t unnerluutiginiarlugit ullumi aalajangermat.

Aammattaaq Nicolo Pollari, siusinnerusukkut Italiami sakkutuut kilitsissiaqarfiannut pisortaasoq unnerluutigisanut ilaavoq. Taakkua tamarmik muslimit palasiata Igitsinimiup Osama Mustafa Hassanip aallarunneqarneranut atatillugu pasillerneqarput. Hassan peqqarniisaarniatut pasineqarpoq taamalu Italiamiut Amerikamiullu isertortumik suleqatigiinnerisigut 2003-mi februaarimi Milanomi aqqusinermi tigusarineqarpoq Igitsinimullu timmisartuunneqarluni, namminerlu oqaluttuarnera naapertorlugu tassani naalliutsinneqarsimavoq.

Pollari siorna atorfimminit tunuartitaavoq. Amerikamiut kilitsissiaat 26-usut najuutinngikkaluartut unnerluutigineqassapput, tassami Italiamiikkunnaareermata. 2005-imi taakkunannga 22-t tigusarineqarnissaannik Italia piumasaqarpoq.

Oqaatigineqareersutut CIA-p tigusanik isertortumik angallassisarneranut tunngatillugu siullermeersumik eqqartuussisoqassaaq. Taamatut angallassisarneq præsident Buship peqqarniisaarnianut sorsunnerani aaqqiagiinngissutaanerpaavoq.