Chukotkami inuuniarneq imaannaanngitsuuvoq
Chukotkami Kolap qeqertaasaanilu innuttaasut quliugaangamik taakkunannga arfineq-pingasut najugaqarfigisaminni inuttut ajornartorsiutilerussuullutik oqaatigisarpaat.
Chukotkami innuttaasut imigassamik ajornartorsiuteqarneq pillugu ilisimatuunit apersorneqaramik apersorneqartut tamarmik isumaqarput, imigassamik ajornartorsiuteqartoqartoq.
Chukotkami innuttaasut pingasuugaangata taakkunannga marluk isumaqarput, ikiaroornartumik atornerluisarneq ajornartorsitigineqartoq.
Imminut toquttarnerit nunani issittuni misissuiffigineqarmata, Chukotkami Kolap qeqertaasaanilu imminut toquttarnerit annertoorujussuupput.
Peqqinnissakkut ajornartorsiutit pillugit Chukotkamiut apersorneqartut affai sinnerlugit peqqinnissakkut ajornartorsiteqarlutik akisimapput.
Inuuniarnikkut atukkat pillugit misissuiffiusuni tassalu, Kalaallit Nunaani Canadami, Alaskami, Norgep avannaani aamma Sverigep avannaani peqqissutsikkut atukkat taakkunani iluarisimaarneqarput.
Missuinermi suleqataasoq Birger Poppel oqarpoq, Sovjetunionisimasumi kommunismemik naalakkersuinerup ajalusoornerata kingorna Kolap qeqertaasaani aamma Chukotkami innuttaasut peqqinnissaqarfimmit sullinneqarnerisa ajorseriarsimanerat takussutissaasoq. Sovjetunionip nalaani peqqissaaviit peqqinnissaqarnikkullu sullissinerit aalaakkaasut periarfissaasimapput, maannakkulli perarfissat taakkua atorunnaarsimallutik.
Ruslandimi kattuffiup Raiponip Ruslandip avannaani Sibieriamilu nunap inoqqaavisa kattuffiat sinnerlugu aallartitaq Rodion Sulyandziga Issittumi Siunnersuisoqatigiit sapaatip akunnerani kingullermi Nuummi ataatsimiinnerani peqataavoq, taassumalu inuit Chukotkami atugaasa ajornerannut tunngavilersuummik allamik saqqummiussivoq:
- Suliffeqarfissuit iluanaarniarlutik aatsitassanik piiaaffinnik aallartitsisarput, nunap inoqqaavisa piniariartarfiinit allamut nuutsittarlugit nunagisaminnilu pisinnaatitaaffiinit oqartussaaffiiarlugit Rodion oqarpoq.
- Russit inatsisiliaat malillugit nunaatigisagut akitsorterussinikkut tuniniarneqarsinnaapput. Tamatuma kinguneraa aningaasaateqarnerit nunamik oqartussaanermik pisisinnaapput, nunamillu oqartussaasunngorlutik.
- Inuit inuunertik naallugu sumiiffinni pineqartuni najugaqarnikuullutik oqartussaaffiiagaanerat naapertuutinngitsorujussuuvoq.
- Pinngitsaalisaalluni nuutsitaasarneq uagutsinnut ajornartorsiutaasorujussuuvq, suliffeqarfissuit nunallu inoqqaavi akornanni atukkat pillugit naammattumik inatsisiliortoqarnikuunngimmat, Radioa Sulyandziga oqarpoq.
Suliffeqarfissuit aatsitassanik piiaanissamut akuersissutinik pigaangamik tikilluaqqusaasarput, tamanna ajornanngitsuararsuuvoq.
Nunamik atuinissamik pisinnaatitaaffiit pillugit ajornartorsitilerujussuuvoq, nunap inoqqaavisa suliffeqarfissuillu akornanni isumaqatigiinngissuteqartarmat, Ruslandimi kattuffiup Raiponip Ruslandip avannaani Sibieriamilu nunap inoqqaavisa kattuffiat sinnerlugu aallartitaq Rodion Sulyandziga oqarpoq.
