Christianiamiut najugaqarfimminnut piginnittussaatitaanngillat
Taamaammat maannakkut Christiania siunissami qanoq inissisimassanersoq qulakkeerneqartariaqalerpoq, Christianiarmiut eqqartuussissuserisuat, Knud Foldschack taamatut oqarpoq.
Eqqartuussutip ullumi nalunaarutigereernerata kingorna
aningaasaqarnermut ministeri Claus Hjort Frederiksen taamatut oqarpoq.
Christianiarmiut kisimik Christianiap ullumikkutut piujuarnissaa kissaatiginnilaat.
Aammali takornariaqarnermik suliallit Danmarkimi alutorineqarnerpaat ilaata tammarnisssaa aarleqqutigaat.
- Naalagaaffiup Christiania inuiaqatigiit sinnerattut ingerlanneqartilerpassuk Københavnimi takornarianit ornigarneqarnerpaaq tammassammat takornariat ikilerujussuarnissaat aarleqqutigisariaqarpoq, Københavnimi Handelshøjskolemi takornariaqarnermut immikkut ilisimasalik, Lise Lych oqarpoq.
Takornariaqarnermik suliallit kattuffiat Wonderful Copenhagen aamma aarlerivoq.
- Københavnip Christiania nunani allani tusaamasaassutigaa pingaartoq. Nunarsuatsinni illoqarfiit angisuut Christianiatut ittumik peqanngillat. Taamaammat Danmarki Københavnilumi alutornartutut, immikkooruteqartunik akuerinnissinnaasutut tamanik tikilluaqqusisutut isigineqartuassappat, Christiania kiffaanngissusillit illoqarfiattut taaneqarsinnaajuartariaqarpoq, Wonderful Copenhagenimi inerisaanermut pisortaq, Peter Rømer Hansen oqarpoq.
Ukiup ingerlanerani takornariat miliuunip affaatut amerlatigisut miliuunilluunniit Christiania aqqusaartaraat Peter Rømer Hansenip naatsorsuutigaa.
