Christianiamiut naalagaaffimmut ajorsarput

Siusinnerusukkut aalajangiunneqareersoq tunngavigalugu eqqartuussisut inerniliipput, tassalu christianiamiut inatsisit naapertorlugit piffissami aalajangersimanngitsumi najugaqarsinnaanngitsut.

Københavnimi Østre Landsretip silataani inuppaaluit eqqartuussisut aalajangiinerat tusarniarlugu ullaap tungaa utaqqerrapput. Kikkut Christianiamik oqartussaassuseqarnerata aalajangerneqarnissaa Pissanngatigineqarpoq.

Christiania naalagaaffiup oqartussaassuseqarfigigaa eqqartuussisut naqissuseqqippaat.

Eqqartuussissusilersuussineq 2004-mi aallartippoq assortuussutaammat kikkut Christianiamut oqartussaassuseqarnersut. Taamani Folketingimi ilaasortanit 179-iusunit 173-it naqissuserpaat Christiania naalagaaffiup oqartussaassuseqarfigigaa.

Christianiamiut ajuallallutik suliaq Østre Landsretimut suliassanngortippaat; maannalu aalajangiineq siulleq naalagaaffiup oqartussaassuseqarneranik naqissusiivoq. Inatsisitigut akersuunnerup tullerissavaa suliaq eqqartuussisut qullersaanni Højesteretimi suliarineqalerpat.

- Eqqartuussisut aalajangernerat akuerinngilluinnarparput, ukiummi 37-t sinnerlugit maani najugaqareerpugut, uagullu oqartussaasuuvugut. Suliaq ingerlaqqissaaq, tulliani Højesteretimi naalagaaffiullu aallartitaat naapeqqissaagut, Christianiamiut oqaaseqartartuat Mette Pagode, eqqartuussisut aalajangernerannut pakatsisimaqisoq oqarpoq.