Christianiami perulluliortoqarpoq suli

Manna tikillugu inuit aqqaneq-marluk tigusarineqarput, politiit ullaap tungaa Christianiamut isaammata illu “Cigarkassen”-imik taaneqartartoq piiariartorlugu.

Christianiami illutoqqat ilaat piiarniarlugu politiit isaagamik sumit tamaanngaanniit takkussuupput aamma Christianiami najugaqartunit tikilluaqqusaanngilluinnarput.

- Politiit sumilluunniit piiagaqassanngillat, allamik piumasaqanngilagut, najugaqartut ilaat oqarpoq.

Politiit 80-inik amerlassusillit illu qanittukkut ikuallassimasoq maannalu sanaqqinneqaleruttortoq piiariartorlugu isaapput. Tassa illu najugaqarfigineqanngilaq, taamaattorli Christianiamiut illup piiarneqarnissaa akerleraat.

- Tamatigut qanoq pissaaneqartiginertik takutinniartarpaat. Maannakkut illu piiariartorpaat, qanoq pisoqassanersoq takujumallugu. Tullianik iliuusissaminnut piareersaatigalutik, najugaqartut ilaat oqarpoq.

Najugaqartut politiillu akersuutileraluarput, politiillu ilaat ataaseq nakorsiartarfiliaanneqarpoq qanngortartuliamit sakkortuumit eqqorneqarluni akornuserneqarami.

- Politiit ujaqqanik milloorneqarput, lastbililu ataaseq ingerlasinnaajunnaarsinneqarpoq qanngortartuliallu sakkortuut qaartinneqartarput. Tassa Christianiamiut ilaat taama qisuariartarput, politiit oqaaseqartitaat oqarpoq.

Illu ataasiinnaq politiinit ullumikkut piiariartorneqarpoq. Taamaaliornerallu illunik amerlanerusunik piiaanissaannut misileraanertut taaneqarsinnaalluni. Tamannali politiit oqaaseqartuannit ilumuunnginnerarneqarpoq.

Politiit Christianiamiittuarsinnarput qaqugulu qimassaneraat ilisimaneqanngilaq.