Christianiami Nunarput pillugu ulloqartitsisoqarpoq

Københavnimi illoqarfik imminut naalakkersortoq Christiania ileqqussamik nutaamik ullumi aallarniivoq. Chistianiami Grå Halimi ukiut tamaasa juullimi niuffatsitsisoqartarnera illoqarfissuarmi nuannarineqarnerpaat ilagivaat, ullumikkullu ulloq Kalaallit Nunaat pillugu immikkut ulloqartitsisoqarpoq, kalaallit Christiaminiittut qitiutinneqarlutik.
Allattoq mlk, Simon Uldum
decembarip 12-at 2013 06:58

Christianimi folkeaktianik tuniniaasut immikkut ulloqartitsinermik aaqqissuisuupput.

- Kalaalerpassuit Christianiani najugaqartuarsimapput, aamma kalaallit namminneq illoqarput, Stjerneskibet, kalaallillu arnat folkeaktialiornermi suleqataalluarsimapput. Taamaammat Folkeaktiamit immikkut ittumik qujaniarfigerusuppagut, Folkeaktien taama allappoq.

Ullumi juullimi niuffatsitsinissami erinarsoqatigiit Aavaat erinarsortinneqassapput, kalaallit nerisassiaannik sanaluugaannillu tuniniaasoqarluni. Aammattaaq isiginnaartitsisartoq Nukâka Coster-Waldau juullimi niuffatsitsinermi folkeaktianik tuniniaaqataassaaq, aamma politikerip IA-meersup Sara Olsvigip peqataanissaa naatsorsuutigineqarpoq.

Folkeaktiat tassaapput illoqarfiup imminut naalakkersortup naalagaaffimmit 2011-mi 76,2 mio. koruunilerlugu pisiarinissaanik isaumaqatigiissuteqartoqarneratigut  piginneqataassutitut pisiarineqarsinnaasut. Folkeaktia Kalaallit Nunaannut ilisarnaatitut nannumik aamma assiliartalerneqarsimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq