Christianiami Nunarput pillugu ulloqartitsisoqalersoq

Illoqarfiup imminut naalakkersortup Christianiap najugaqartuni kalaallit nersorniarlugit ukiormanna juullimi niuffatsitsisoqarnerani kalaallit pillugit ulloqartitsiniarpoq. Ilaatigut kalaallit erinarsoqatigiit erinarsussapput, kalaalliminernik sassaalliisoqassaaq, kaffillertoqarluni juullimullu qiortaatitsisoqassalluni.
Allattoq Martine Lind Krebs, Simon Uldum
oktobarip 23-at 2013 06:01

Christianiamiut illoqarfiup imminut naalakkersortup 76 mio. koruunilerlugu pisiarineqarnissaanik danskit naalagaaffiat 2011-mi isumaqatigiissuteqarfigaat. Pisiarineqarnissaanullu atatillugu innuttaasut piginneqataassutissaannik tuniniaasoqarpoq, illoqarfiup imminut naalakkersortup pigiinnarnissaanut danskit akileqataanissaat siunertaralugu. Kalaallillu arnat piginneqataassutinik suliaqarnermi aalajaallutik suleqataalluarsimapput, Christianias Folkeaktie taama allappoq. Ilaatigullu taamatut suliniuteqartoqarsimanera nersorniarlugu ukiormanna juullimi niuffatsitsinermut atatillugu kalaallit pillugit immikkut ulloqartitsisoqassaaq.

Christianiamiut folketingimut ilaasortaq Sara Olsvig aamma isiginnaartitsisartoq Nukaka Coster-Waldau ullormi tassani peqataaqqullugit qaaqqusimavaat, allallumi aamma qaaqqusaajumaartut neriorsuutigalugu.

Innuttaasut piginneqataassutissaattut allagartat Kalaallit Nunaannut ilisarnaatitut nannumik aamma assitalerneqarsimapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq