"Christiania" saaffiginnittarfillu

Christianiami saaffiginnittarfiup siunissaa qanoq issanersoq suli paasineqanngilaq. Saaffiginnittarfik taanna ateqarpoq: ”Herfra og Videre”, maanngaaniit ingerlariaqqiffik. Taanna kalaallit Danmarkimi najugallit inuuniarnermikkut ajornartorsiuteqartut saaffiginnittarfigaat, taannalu peerutissappat kalaallit Danmarkimi atugarluttut eqqugaasinnaapput.

Københavnip kommunia siornatigut 2,6 mio. kr.-nik aningaasaliisarsimavoq, maannakkullu kommuni aningaasaleeqqinniarnani aalajangersimavoq. Christianiami ajornartorsiortut aappaagumiit kommunimut saaffiginnittalissapput.

Saaffiginnittarfik matoqqajaasoq pillugu ippassaq københavnip kommuniata, ilaqutariinnermut suliffeqarnermullu ataatsimiisitaliaa ataatsimiippoq, iluamilli aalajangertoqarani. Saaffiginnittarfik Herfra og Videre qanoq pineqarumaarnersoq ullut 14-it qaangiuppata paasinarsissasoq ilaqutariinnermut suliffissaqarnermullu pisortaqarfik sinnerlugu tusagassiuteqarnermut siunnersorti Lisberth Armand oqarpoq.