Christiania nersornaasiinissamut innersuunneqarpoq

maajip 18-at 2007 17:13

Københavnimi illoqarfiup ilaa imminut napatittoq, Christiania, Nordisk Rådip Pinngortitamut Avatangiisinullu ukiormanna nersornaasiinissaanut innersuunneqarsimavoq.

Nersornaasiinissamut 350.000 koruuninik aningaasartaqartumut katillugit 29-t innersuussutigineqarsimapput.

Christianiap nersornaasigassatut innersuussutigineqarneranut tunngavilersuutigineqarpoq, illoqarfiup ilaa taanna imminut napatittoq 1971-imi pilersinneqarmalli avatangiisit pingaartinneqartuarsimanerat. Tamatuma saniatigut illoqarfiup ilaata taassuma biileqannginnera sikkilillu Christianiacykelimik taaneqartartup nassaarineqarsimanera tunngavilersuutigineqarput.

Ukiormanna nersornaasiinissami illoqarfik avatangiisinik isumaginnilluartoq pingaarnerutinniarneqarpoq. Nersornaaserneqartussaq tassaassaaq Nunani Avannarlerni kommune, suliniaqatigiiffik, inuk imaluunniit suliffeqarfik maligassiuinermigut soorlu makkuninnga ineriartortitsisimasoq: illoqarfiup ilaani aneersuarfiusinnaasut, eqqagassanut isumaginninneq imaluunniit illoqarfiup ilaanut nukissiuuteqarneq.

Christianiap toqqagaanissamut nunani avannarlerni kommunit arlallit unammilliinnarnagit ilaatigut aamma unammillerpai Odense, Albertslund aamma Frederikshavn.

Avatangiisinut nersornaat ukiormanna 13-issaa tunniunneqartussaavoq, tamannalu pissaaq Nordisk Rådi Oslomi oktobarimi ataatsimiilerpat.