Christiania nalliuttorsiorpoq
Christiania ukiunik 35-ngortorsiorluni ullumikkut nalliuttorsiorpoq, ullormilu nalliuttorsiorfimmi illoqarfimmut imminut naalakkersortumut pingaarutilimmik pisoqarfiussagunarpoq.
Christianiap allanngortiterneqarnissaa, najugaqartullu akeqanngitsumik najugaqarnerisa allanngortinnissaat pillugu Danmarkimi naalakkersuisut Illussaarsuarnut Illunillu tuniniaasartunut pisortaqarfimmut qinnuteqarnikuupput, tamannalu ualeru pisortatigoortumik saqqummiunneqassaaq:
Christianiami najugaqartut ukiut 35-t ineqarnermut akiliissanatik ineqarnermut akiliisalissapput, Christianiap oqqiffittut ornigarneqarnera killilersorneqalissaaq kiisalu Christianiami illut nalunaarsorneqalissallutik. Illut aaqqissuuteqqinnissaannik neqerooruteqartoqareerpoq.
Naatsumik oqaatigalugu neqeroorutaasut najugaqartunit itigartikkuminaatsorujussuusut Christianiami najugallit inatsisilerituuata siusinnerusukkut nalunaarutigereerpaa Christianiami illut ataannarnissaat najugaqartunit kissaatigineqarpoq.
Christianiap aaqqissuuteqqinnerata kingorna inuit najugaqartussat qanorittuunissaat, ineqarfiit sumut atorneqarnissaat massakkut najugaqartunit eqqartorneqangaatsiarpoq. Isumaqatigiinniarnerni najugaqartut neqerooruteqartullu assortuunnissaat ilimagineqarpoq.
Christianiami najugaqartut isumaat Niels Fridip ilisimasaqarfigimmagit DR-imit tassunga apeqqutigineqarpoq qanorpiaq taakku isumaqarnersut, taannalu ima akivoq:
- Christianiami najugallit ataatsimoorlutik eqqartueqatigiinniarlutik isumaqatigeereerput. Ilaat illutik piiarneqassappata eqqartuussivilersuussiniarlutik siorasaarereerput. Taamalu pisoqassagaluarpat ukiut arfineq-marluk angullugit utaqqisoqarsinnaassoq, Niels Frid oqarpoq.
