Christian Høy Qaaanaaliartinneqalerpoq

Royal Greenland-ip ”Christian Høy” Qaanaaliartilerpaa aalisartut kattuffiat KNAPK kiisalu Pinngortitaleriffik suleqatigalugit taama avannarpasitsigisumi iluanaarutitalimmik aalisartoqarsinnaanersoq siullermeerutaasumik paasiniarlugu.

- Siunertarilluinnarparput paasiniassallugu qanoq aalisagaqarfiginersoq iluanaarutaasumillu aalisartoqarsinnaanersoq, allaat ukiup tulliani ”Christian Høy” allaluunniit angallat atorlugu aalisartitsisinnaanissaq tunngavissaqarnersoq paasiniarniarlugu. Royal Greenlandip pisortaa Henrik Leth taama oqarpoq.

Henrik Lethip ”Christian Høy” qaammatip pingajuata qeqqa tikillugu Qaanaap Savissiviullu eqqaani aalisassanerarpaa.

Nanortalimmit Upernavik tikillugu aalisariutillit 15-it peqataaniarlutik nalunaarsimapput. KNAPK-mili siunnersortip Egede Mathiassenip suli qulakkiigassaqarnerarpaa:

- Kisianni maannakkumut suli qulakkiinngilarput peqataasussat taavunga qaleralinniariartortussat aningaasarsiornermikkut aningaasanik annaasaqannginnissaat qanoq isillugu qulakkiissallutigu. Egede Mathiassen oqarpoq.

Aammali tunitsivissaq angallat inuttalerneqartussaavoq:

- Christian Høy nammineq inuttaqassaaq aamma periarfissaqarpoq Royal Greenlandimik oqaloqatiginninnerput tunngavigalugu aamma “Christian Høy”-mi qaleralilerisussat Qaanaaminngaaneersunik imaluunniit Savissivimminngaaneersunik tassa Qaanaap kommuneaninngaaneersunik inuttaqarsinnaanissaa. Egede Mathiassen nassuiaavoq.

Egede Mathiassenip aamma erseqqissaatigaa, aalisariutinut ataasiakkaanut ikillutik Qaanaarmiut aalisarnermik ilinniartinneqarsinnaasuttaaq.

Aalisarnermik misileraanik avataani ingerlanneqartussaammat umiatsiaaqqanik tunisisarnissaq ajornassaaq.