Christen Sørensenip ernumanera Josef Motzfeldt-ip tapersinngilaa

Isumaginninnermi ajornartorsiutit ilinniartitaanerup iluani pilersaarutinut kinguarsaataanissaat, nunatsinni aningaasarsiorneq pillugu statsministerimut siunnersuisartut siulittaasuata, professorip Christen Sørensen-ip ernummatigisaa. Tamannali Aningaasaqarnermut naalakkersuisumit, Josef Motzfeldtimit isumaqatigineqanngilaq, Naalakkersuisut aningaasanut inatsimmi ilinniartitaanermut isumaginninnermullu tunngasuni pilersaaruteqarnerat oqimaaqatigiissaarinerullunilu ineriartortitsinerummat:

-Naalakkersuisut aningaasanut inatsisissami siunnersuutiminni, sapinngisamik oqimaaqatigiissaariniarneq ineriartortitsinerlu pisariaqartitsinermillu ikiorsiissutissatut isigineqarsinnaasut eqqarsaatigalugit, sapinngisamik unneqqarissaarniarsaralutik siunnersuut suliariniarsimavaat. Aammali isumaginninnermut ilaqutariinnermilu pisortaqarfik kisiat eqqarsaatigiinnarnagu aamma peqqinnissaqarfik, ilinniartitaaneq suliffissaqartitsinermullu pisortaqarfiit eqqarsaatigineqarput. Aningaasat ataatsimut katikkaanni inuiaqatigiit innarluttumik ingerlaleraluarnerannik iluaqutaasinnaasunik sunniutissatut aningaasaliiffigisassat annertuut tassuunakkut aamma taamaalillutik aningaasaliiffigineqarput, Josef Motzfeldt oqarpoq.

Nunatsinni aningaasarsiorneq pillugu statsministerimut siunnersuisartut siulittaasuata, professor Christen Sørensen-ip naalakkersuisut aningaasaliinerminni isumaginninnermi ajornartorsiutinik qaangiinissamut naammattumik suliniuteqarnersut apeqquserpaa. Meeqqat ilikkagaqassagunik pingaaruteqarpoq peroriartornerminni toqqissisimasuunissaat, Christen Sørensen tunngavilersuivoq. Tamannalumi Josef Motzfeldt-imit isumaqatigineqaraluartoq, ilanngullugu oqaatigaa naalakkersuisunit pingaartinneqartoq inatsisartut aningaasanut inatsisaatigut aningaasaliissutigineqartut kommunit innuttaminut qanimut iliuuseriginiagaanut tapertatut isigineqassasut.

-Inatsisartut aningaasanut inatsisaatigut anigaasaliissutigineqartut, kommunit innuttaminnut qanimut qanoq iliuuseriniagaanut tapertaasussatut isigineqarnissaat naalakkersuisunit pingaartipparput. Innutaasullu ataasiakkaarlutik, ilaqutariiaarlutik imaluunniit nunaqqatigiiaarlutik, oqallinnermut taama ersaritsigisumut arlaatigut equngasoqartumut, iluarseeqataaniarunik nalussanngilaat qitiusoqarfimminngaanniit qanoq iliuuseqarniartugut. Kisianni taakku kisimik isumalluutissaanngillat. Tamatta aaqqiiniaqataalluta peqataasariaqarpugut, Josef Motzfeldt naggasiivoq.