Christen Sørensen: Qinikkat aalajangigaat oqartussaaffiginngilakka
- Sinersortaatinik angallanneq attatiinnarneqarpat inuiaqatigiinnut imminut akilersinnaanngitsoq isumaqarpunga. Pissutsilli assigiinngitsut qinikkat aningaasarsiornermillu immikkut ilisimasallit eqqarsaatigisariaqarpaat. Angallannikkut isumannaallisaanerit, inooqatigiinnermut kulturikkullu eqqarsaatigisassat qinikkat ilaatigut pingaarnerutissinnaasarpaat, uagullu aningaasarsiornermik immikkut ilisimasallit pissutsit allat eqqarsaatigisarlutigit, Assartuussineq pillugu Isumalioqatigiissitat siulittaasuat Christen Sørensen oqarpoq, nangillunilu:
- Assersuutigalugu Arctic Umiaq Line-imut immikkut aningaasaliisoqassappat, taava aningaasat suminngaanniit aaneqassanersut qinikkat eqqarsaatigisariaqarpaat, uagummi immikkut ilisimasalittut taamaliortussaannginnatta, Christen Sørensen oqarpoq.
Isumalioqatigiissitat innersuussutaasa ilaannik malinninniaratik Nalakkersuisut aalajangersimanerat, Isumalioqatigiissitat siulittaasuata uggorinngilaa.
Arctic Umiaq Line-imut tapiissutit ingerlateqqinneqarnissaat, Naalakkersuisut Inatsisartut Aningaasaqarnermut Ataatsimiititaliaannut inassutigivaat, akuerineqassappatalu ukiumiit ukiumut assigiinngiiaartunik tapiisoqartariaqassaaq, agguqatigiissillugu ukiumut 12 millionit koruunit missaat ukiuni tulliuttuni tapiissutigineqartassallutik.
Arctic Umiaq Line-illi attatiinarneqarnissaa inuiaqatigiinnut qanoq akisutigissanersoq apeqqutaalerpoq.
Sarfaq Ittuk, Dansk Internationalt Skibsregisterip ataani ingerlavoq, malitsigaalu inuttat akileraaruteqarneq ajornerat.
Tapiissutit saniatigut inuttat akileraarneq ajornerat katillugit 20 millionit koruunit missaannik inuiaqatigiinnut naleqarsimanissaat, Christen Sørensenip ilimagaa:
- 20 millionit koruunit tikillugit suminngaanniit aaneqassanersut politikerit namminneq aalajangissavaat. Uanga tamanna oqartussaqarfiginngilara, aamma Aningaasaqarnermut Ataatsimiititaliamut taama oqarpunga. Aningaasat amerlanerusunik isertitaqarnikkut, assersuutigalugu akileraarutinik akitsuutinilluunniit qaffaanikkut aaniarneqarsinnaapput, sipaaruteqarnikkulluunniit aamma aaneqarsinnaallutik. Oqareerpungali tamanna aalajangiiffigisussaanangu, Christen Sørensen oqarpoq.
Angallannikkulli allannguutissat pillugit qinikkat maannangaaq qanoq iliuuseqarsinnaanersut aperaarput, Isumalioqatigiissitallu innersuussutai allat taakkartorlugit:
- Narsarsuarmi mittarfik matullugu Qaqortumilu mittarfiliortoqarnissaa innersuussutigaarput, soorlu aamma containerinut Nuummi nutaamik umiarsualiviliortoqarnissaa innersuussutigigipput. Taamaaliortoqarpammi umiarsuit annerit atorneqarsinnaalissapput, sipaarutillu annerusinnaalissagaluarlutik, Christen Sørensen oqarpoq.
Taanna ullumi Ilulissiarpoq, Assartuussineq pillugu Isumalioqatigiissitap isumaliutissiissutaa pillugu innuttaasunik tassani ataatsimiisitsiartorluni.
