Christchurchimi ajortumeerisoqarnerata kingunerisaanik Facebook sukaterisoq

Facebookip massakkut Facebookimi atortumik Facebook Livemik atuinermut malittarisassat sukaterniarpai, taanna tassaavoq inuit attaveqaqatigiittarfianni tassani toqqaannartumik tamanut videonik takutitsivik.
Facebookip malittarisassaanik unioqqutitsisimasut siunissami aalajangersimasumik sivisussusilerlugu Facebook Livemik atuinissamik inerteqquteqarfigineqartalissasut paasissutissiissutigaa.
Allattoq Ritzau
maajip 16-at 2019 12:15
Nutserisoq Per Rosing

Tusagassiuutinut nalunaarummi Facebook taama nalunaarpoq.

Nunarsuarmi nunani siuttut Parisimi pingasunngornermi naapinnginneranni tamanna pivoq

Naapeqatigiinnermi isiginnaagassiat nakuusernernik ingasaassinernillu imallit attaveqaqatigiittarfitsigut ingerlateqqinneqartarnerat oqallisigineqassaaq.  

Peqataasunut ilaapput Frankrigip præsidentia Emmanuel Macron, aamma New Zealandip ministeriunera Jacinda Ardern.

Attaveqaqatigiittarfitsigut nakuusernernik toqqaannartumik isiginnaagassiortarnerup unitsinneqarnissaa kingulliup tamaviaarluni sulissutiginiarpaa.

Taamaaliorniarneranut New Zealandimi illoqarfimmi Christchurchimi muslimit naalagiartarfiinik moskénik marlunnik saassussineq peqqutaavoq. Saassussinermi inuit 51-it toqutaapput,  saassussinerullu ilaa Facebookikkut toqqaannartumik takutinneqarpoq.  

- New Zealandimi ingasattajaartup amiilaarnaqisumik saassussinerata kingornatigut ajoqusiinerit pilersinneqanissaannut imaluunniit qinngarsuinerit ingerlateqqinnissaannut  kiffartuussissutitta qanoq unitsitsisinnaanerat misissorparput, Facebookip vicepræsidentia Guy Rosen oqarpoq.

Facebookip malittarisassaanik unioqqutitsisimasut siunissami aalajangersimasumik sivisussusilerlugu Facebook Livemik atuinissamik inerteqquteqarfigineqartalissasut paasissutissiissutigaa.

Teknologikkut attaveqaqatigiittarfipiluunersuit soorlu Facebook, Google, Microsoft aamma Twitter pingasunngornermi siuttut ataatsimiinneranni Frankrigimi illoqarfiit pingaarnersaanni peqataassapput.

/ritzau/Reuters