Chris Ilulissani saqusutut ulluinnarni sulisarpoq, suleqatinilu allat Sisimiunut marsip aappaani pikkorissariarput. Nualluutilli coronavirusip ilungersunartorsiortitsileriataarneratigut pikkorissarnerat oqartussat unitsippaat.Assi: KNR

Chris Sisimiuni sapernusoq: Paasitinneqanngilagut

Chris Bech Johansen Sisimiuniit ingerlariaqqinnaveeqqavoq, Air Greenlandimmi angallassinini coronavirus pillugu unitsimmagu saperngulerpoq.

- Maaniilluni erloqinaqaaq. Ilaquttattami uaugutsinni utaqqigaluarpaatigut.

29-nik ukiulik Chris Bech Johansen Sisimiuni saperngusoq taama oqarpoq. Taassuma qaqugu Sisimiuniit ingerlaqqissanerluni susoqassanersorlu naluaa.

Chris Ilulissani saqusutut ulluinnarni sulisarpoq, suleqatinilu allat Sisimiunut marsip aappaani pikkorissariarput.

Nualluutilli coronavirusip ilungersunartorsiortitsileriataarneratigut pikkorissarnerat oqartussat unitsippaat.

Taamatut pisoqarmat Chris suleqataallu piaarnerpaamik angalanissartik allanngortipallattariaqarpaat. Ulloq marsip 20-anni taamaaliorput, ullorlu taanna Air Greenlandip timmisartuisa angallassiffigisinaasaasa kingulleraaat.

Timmisartussaralualli aallanngitsoorpoq. Air Greenlandip timmisartua ajoquteqarnera silarlunneralu peqqutigalugu angalasussat tamarmik aallanngitsoorput.

Angalasussaagaluit Air Greenlandimit Sisimiut akunnittarfianut ataasinngornermi inissinneqarput.

Ataasinngornerulli ullaap tungaani Air Greenlandimit Chrisi suleqataalu siarnerfigineqarput:

Ernertaaqqammerpoq 

- Air Greenlandimiit sianerfigineqarpugut isumagineqarunnaartugut, qaqugulu angallanneqarnissarput inissinneqarpat attavigineqarumaartugut ilisimatippaatigut.

Chrisip oqarnera naapertorlugu Air Greenlandiminngaaniit ilisimatinneqarpoq, marlunngornermiit akunnittarfimmi najugaqarnerat akilersorunnaassagitsik.

Maannalu qanoq pisoqaqqisanersoq taanna maannamut paasitinneqanngilaq.

- Qaqugu angerlarsinnaanerlunga, qaqugulu susoqassanersoq paasissutissanik amigaateqarpunga. Unnuinissannullu nammineq aningaasartuuteqassanerlunga paaserusukkaluarpara.

Chris Bech Johansenip ernera inoorlaaq marlunnik qaammatilik Ilulissani utaqqivoq.

- Maqaasingaarakku oqaasertaleruminaatsippara.

Taanna aprilip sisamaani 30-liissaaq, imaassinnaavorlu ullorlu taanna aatsaat angerlarsinnaasoq.

Qeqqata Kommunianit Chris suleqataallu unnuiffigisinnaasaannik isumagineqassasut neriorsorneqarsimasut, Chris oqarpoq. Kommunimiimmi nerisaqarnerat ineqarnerallu apriilip arfernga tikillugu isumagineqassasut taanna oqarpoq. Tamaakkaluartorli erloqivoq.

Puigorneqarpugit?

Aamma Kangerlussuarmiit Maniitsumut angalasussaagaluartoq, Poul Lyberth, sapernusut ilagaat. Taanna oqartussanit qanoq ikiorneqarnissaminik aamma nalornivoq, sulimi paasissutissinneqanngilaq.

Foto: Poul Lyberth

-  Sivitsorami, iluamillu tassuunakkut paasitinneqassanata. Qullersaqarfinninngaaniit eqqaamaneqarnerpugut? Imaluunniit nalunnginneqarnerpugut? Immaqaluunniit soormita taamatut inissittugut, paaserusunnalaaraluarpoq, 

Poul Lyberth oqarpoq.

Taanna tallimanngormat Kangerlussuarmiit Maniitsumut angerlartussaalluni aallaraluarpoq, silarlummalli missinnannginnamik Kangerlussuarmut uteqqipput.

- Utaqqinarpoq. Naammagittarnarpoq. Soorunami aamma naammagittaannarsinnaajunnaavilluta misigisimavugut. Angerlarusukkaluarpugut, paaserusupparput sunersugut.

Air Greenland Naalakkersuisoqarfillu: Uagut akisussaaffiginngilagut

Air Greenland pisumut oqaasissaqarpallaanngilaq. Naalakkersuisoqarfimmullu innersuussillutik:

-Ilaasut ingerlariaqqinnaveertut pillugit oqartussat attavigineqassapput, Air Greenlandimi attaveqaqatigiinnermut pisortaq, Masaana Egede oqarpoq.

Naalakkersuisunullu attaveqaraanni aamma paasissutissanik pissarsivissaavallaanngillat. 

Ineqarnermut attaveqaqatigiinnermullu naalakkersuisoq kommuninut saaffiginneqqusivoq, taassuma oqarnera naapertorlugu taakku akisussaasuummata.

Sumut sianertoqarsinnaava?

Kommuneqarfik Sermersuup attaveqaqatigiinnermut pisortaata, Lars Damkjærip, angalallutik ingerlariaqqinnaveertunut tunngasunik paasissutissinneqarumasut Air Greenland saaffigissagaat inassuteqarpoq.

Taamaalilluni suliffeqarfiup pineqartoq ilumut angalasuusoq uppernarsarpassuk taava najugaqarnissaanut nerisaqarnissaanullu akiliunneqarnissaa isumagineqassasoq, taanna ilisimatitsivoq.

Tamannali Air Greenlandimut unammillernarsimavoq, ullormummi siarngunnerit imaaginnavipput.

- Ullormut sianertut 800-900 missaaniittarput, uagullu sapinngisarput tamaat akisinnaasagut akiniartarpagut, Air Greenland nittartakkamini allappoq.  

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7448
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 18-iat 2020 nal. 10:45