Chresten Sørensen: Namminneq aalajangigassaraat
Politikerit aatsitassat qallorneqarnerinit aningaasarsiorluarnissaq kisiat isummerfigisussaanngilaat aammali sulisussat inissitsiternerisa kingunerisaanik aningasarsiat agguataarneqarnissaasa sunniuteqarnissaat ilanngullugu eqqarsaatigalugu aalajangiisussaapput. Anguniagassatullu isummerfigineqartussat taakku marluk imminnut aporaatilersinnaapput, uagullu teknikkertaat nalunaarusiariinnarsinnaavagut politikerillu anguniakkat sorliit qaqugukkut qanoq agguataarnissaat pingaarnersiorlugit aalajangiisartussaapput. Uanga isumaqarpunga siunissami Kalaallit Nunaanni aningaasarsiornissamut periarfissat assigiinngitsut amerlasoorpassuusut uangali aalajangersinaanngilara qaqugukkut aningaasarsiorluarnissaq pingaartinneruneqassanersoq qaqugukkullu sulisussat suminngaanneersut qanoq amerlatigisut sumi qaqugulu atorfissaqartsinneqarnissaat pingaartinneqarnerussanersut. Assersuutigalugu aluminiuliorfiliussagaanni sulisussat amerlanersaat tamarmilluunnit Kalaallit Nunaanneersuussappata inuppassuit sumiiffimmi ataatsimi sulisinneqartussaasut naluneqanngilaq, taannalu 2015-imi piviusunngorsinaavoq. Taamaammat Kalaallit Nunaanni sumiiffinniit allaniit illoqarfimmut aluminiuliorfimmik inissiivissamut suliartortinneqartussaassapput tamannalu pitsaasutut isigineqarsinnaavoq inuppassuit aningaasarsiarissaartinneqartut sulisinneqalersinaassammata aningaasanillu inuiaqatigiit tamarmik aningaasartuutissaannut ilapittuutissanik isaasoqalissammat, Kalaallit Nunaata aningaasaqarnera pillugu siunnersuisoqatigiinni siulittaasoq, Chresten Sørensen oqarpoq.