Cho Seung Hui-p videoliai siaruarterneqarput

Aqqit, soorlu Jack the Ripper, Charles Manson aamma Timothy McWey, tusaraangatsigik inupiluit inorersorsuit eqqaasarpavut, taakkualu suliapilui pillugit eqqaamaneqartuarput. Virginiami teknikimut universitetimi 32-nik ataasinngormat toqoraasumit, Cho Seung-Hui-mit, taakku akimorneqalerunarput.

Ataasinngormat siullermik toqutsinermi kingornagut, aamma ilinniarfimmi toqoraalinnginnermini, Cho allakkerisarfiliarsimavoq, poortukkamillu videoliaminik, allanillu malugeqqusaarutissaminik, imalimmik nassiussisimalluni. Videoliai maanna internetikkut tv-qarfitsigullu nunarsuaq tamakkerlugu siaruarterneqaleruttorput.

Kisianni suliapilui inuttaalu ima soqutigineqartigissanerpat, allaat siunissami eqqaamaneqartuassallutik?

Cho Seung-Hui ullualuit matuma siornatigut ilisimaneqanngilluinnarpoq. Maannali internetimi Google-mi aqqa ujaraanni millioneriarlugu naammattoorneqarsinnaavoq.

- Qujanartumik ilissi pisuullusi Jesusitut inuit sanngiitsut ikiortissaqanngitsullu pillugit toqussaanga, Cho Seung-Hui videoliamini soqutigineqaqisumi oqarpoq.

- Minutsini 15-ini nunarsuarmi tusaamasanngornissani anguniarsimavaa, tamannalu iluatsissimallugu, taama oqarpoq qanoq tusaamasanngortoqarsinnaanera pillugu atuakkiorsimasoq, Peter Horn.

Naak toqoraasup tusaamanerlunneqarnissani angugaluaraa, Peter Horn isumaqarpoq, siunissami eqqaamaneqarnavianngitsoq.

- Soorlu angutit marluk USA-mi aqqusinermi kikkunnik tamanik toqoraammata, tusagassiuutitigut sammineqartorujussuupput. Kisianni tigusaammata parnaarunneqarlutillu ingerlaannaq puigorneqarput, isumaqarpungalu aamma pisimasoq una puigulertorneqassasoq, Peter Horn oqarpoq.

Toqoraasup videoliaa internetimi takuneqarsinnaalereerpoq.

Toqoraasullu eqqarpalunnera

internetimi You Tube-mi nuannarineqartorujussuuvoq.

Kisianni tamanna sivikitsuinnaassaaq.

- Maanna soqutigineqartorujussuuvoq, kisianni tamanna sumut atorsinnaassagamiuk? Toqoreerpormi! Peter Horn oqarpoq.