Chilep præsidentia arnaq ivertinneqarpoq
Amerika kujallermi naalagaaffeeqqat ilaanni Chilemi arnanik angutinillu naligiissitsiniarneq ilorraap tungaanut aallarpoq Chilemi præsidentimut januaarimi qinersinermi ajugaasoq arnaq 54-inik Michelle Bachelet præsidentitut ippassaq ivertinneqarmat.
Bacheletip qinersisartut 53,5 procentiinit taaguunneqarluni ajugaasup ippassaq ivertinneqarneranut nunanit assigiinngitsunit qaaqqusat 120-it najuupput, taakkununnga akuulluni USA-p nunanut allanut ministeria Condoleezza Rice.
- Chilemut aammali nunarsuarmi arnanut tamanut ulloq pingaartuuvoq, Condoleezza Rice ippassaq ilaatigut taama oqalugiarpoq.
Bacheletip præsidentimut sassarami pingaartumik qineqqusaarutigisimavaa Chilemi arnarpassuit oqillisaat, tassalu Chilep angutaannangajannik aqunneqarnerata allanngortinneqarnissaa.
Chilemi arnat 40 procentii angerlarsimaffiup avataani alajangersimasumik suliffeqanngillat, arnallu aalajangersimasumik atorfillit angutinit 40 procentimik annikinnermik aningaasarsiaqartuupput.
