Borgmesteri Charlotte Ludvigsen 1512-inik qinerneqarsimavoq. Kommunimut qineqqusaarnerup siuliani 2017-imi 77-inik qinerneqarsimalluni. Assi: KNR.

Charlotte Ludvigsen illoqarfiit pingaarnersaanni amerlanerpaanik taaguunneqartoq

IA-iminngaanneersoq borgmesteri, Charlotte Ludvigsen kisitsisit malillugit borgmesteriuinnarnissaa ilimanarluinnarpoq. 

Borgmesterimi Charlotte Ludvigsen 1512-inik qinerneqarsimavoq. Kommunimut qineqqusaarnerup siuliani 2017-imi 77-inik qinerneqarsimalluni. 

Inuit Ataqatigiit illoqarfiit pingaarnersaanni anginerpaavoq 45,1 procentinik qinerneqarluni, Siumut qinerneqarnerpaat tulliattut inissilluni 29,4 procentinik taaguunneqarluni. 

- Tassa amerlanerpaanik taaguunneqarpunga. Partiinillu allaneersut aqangu oqaloqatiginissaat qilanaaraara, Charlotte Ludvigsen oqarpoq. 

Illiussua maanna isumaqatiginninniarsarisussaq? 

- Aap, taanna ilumoorpoq. Tamannalu nuannerpoq. 

Qinersinermi kingullermi 77-init taaneqarputit, massakkullu 1512-init taaneqarlutit, qanorililluni tamanna piva?  

- Aap, siuariarnerujussuuvoq. Tamannalu sukkut tamaana borgmeseterinngorsimanera tunngaviulluarunarpoq. Partiillu tamaasa oqaloqatiginissaanut aggersassavakka, qilanaaqaangalu. 

Ludvigsen sukkut tamaana borgmesterinngortoq

Charlotte Ludvigsen pisarnermit aallaanerusumik borgmesterinngornikuuvoq, tassami qinersinereernerup kingorna borgmesteriusimasoq Asii Chemnitz 2019-imi juulimi tassangaannaq borgmesteriujunnaarmat paarlannikuuaa. 

Tamanna kommunalbestyrelsemit ilaasortanit borgmesterimut partiianullu suliamut Tasiilamut tunngasuteqartumik tatiginnikkunnaanerat pillugu. 

Taamanillu kommunalbestyrelsemit ilaasortat amerlanerussuteqartut aalajangerput Charlotte Ludvigsenip paarlassagaa. 

Isummersuutit