Haagimi sorsunnerit nalaanni pinerlussimasunik eqqartuussivimmi Liberiami præsidentiusimasup, Charles Taylorip unnerluunneqarnera aallarteqqinneqarpoq. Charles Taylor Sierra Leonemi 1991-imiit 2001-ip tungaanut toqoraallutik, aqqunartiteralutik pinngitsaaliisarlutillu pikittitsinianik, aligoqqinnik akilerneqartarluni aqutsisimasutut unnerluussaanikuuvoq.
Eqqartuussivik ukiup affaa unikkallarnikuuvoq, Taylorilu afrikami nunani naalakkersuisuusimasut, sorsunnerit nalaanni pinerlussimasunik nunat tamat eqqartuussivianni unnerluussaasut siullersaraat.
Canadamioq Ian Smillie, piviusulersaarummik ”Bloddiamanter” – imaluunniit ”Aligoqqiit aattallit” pillugit filmiliornikoq uppernarsaasutut qaaqquneqarsimavoq.
Sierra Leonemi pikittitsiniat sungiusarnissaannut Taylor aligoqqinnik akilersilluni ikiuussimaneragaavoq, aligoqqiillu sorsunnerup ingerlatiinnarnissaanut akiliutigineqaqqissimaneragaallutik. Akersuunnermi inuit 120.000-it toqutaapput, tusindillillu talii, niui, siutaat qingaallu pikittitsinianit kipineqartarsimallutik.
Ukioq 2009-p naalernerani eqqartuussinerup naammassinissaa eqqartuusivimmi unnerluussisuunerup naatsorsuutigaa.