Tine Parsip censorinik ataatsimiitsitsiniarnera Margrethe Sørensenip nuannaarutigaa.Assi: Jonas Løvschall-Wedel

Qulaarpaa Censorini pitsaassuseq suleqatigiinnerup qaffassassavaa

Ilisimatusarfiup angusat qaffasissuunissai ukkatarinerulerniarpaa, taamaalillunilu inuiaqatigiinnut paasitillugu, ilinniagaqarnermut uppernarsaatini angusat allassimasut aamma eqqortuummata.

Ilisimatusarfiummi nalilersorneqarnerata paasinarsitippaa arlaatigut eqqunngitsoqartoq, soraarummeerutinillu taamungaannaq tigooqqaalluni misissukkat affai qaffasippallaamik nalilerneqarsimasut.

Siulleq nalilersorneqaqqinnavianngilaq

Aaqqiissutaasinnaavoq Ilisimatusarfimmi ilinniakkat allat aamma nalilersorneqarpata, taamaattoqarnavianngilarli.

- Ilinniartitsisunngorniarfimmik nalilersuineq 1,5 millioner koruuneqarsimammat nalilersueqqittoqarallarnavianngitsoq, rektor Tine Pars oqarpoq.

Aamma atuaruk  Ilinniarfissuaq EVA-p naliliinerani angusinngitsoortoq

Taassuma taarsiullugu tikkuarpaa, karakterinik nalileeqataasartunillu censorinik nakkutiginnittarnerit aqqutissaasut, ungasinnerusumilu imaassinnaasoq nalilersuisoqaqittoq.

Ataatsimoorneq amigaatigineqartoq

Censorillu ukkatarineqarnerunissaat peqqutissaqarluartoq, ukiut 20-it ingerlanerini Ilisimatusarfimmi censoriusarsimasoq Margrethe Sørensen oqarpoq.

- Censoriusartunut ataatsimut malittarisassaqanngilaq, censorillu imminnut attaveqatigiissanatik. Imminnut ilisarisimanngillat. Ilisimatusarfimmi soraarummeertoqarneranut atasumik ulapaartoqarnerani ilasseqatigiiginnartarpugut. Censorilli suleriaasaat qanoq ittuussanersoq eqqartunngisaannarparput, Margrethe Sørensen oqarpoq.

Aamma atuaruk  Ilisimatusarfimmi qaffasissuseq qaffappoq​

Aamma atuaruk  Tine Pars: Ilinniartut piginnaasallit isiginiarneqartariaqarput

Ilisimatusarfik nunat assigiinngitsut akornanni anguneqartartutut qaffasissuseqartussaavoq.  Politikerit tamanna aalajangersimavaat inatsisinullu allallugu. Tine Pars oqaluttuarpoq pitsaassuseq eqqarsaatigalugu ingerlatseriaatsip inissinneqarnissaa sivisusimasoq, tunuliaqusiisullu peqatiginerullugit qaffassaanissaq aaqqiissutaasinnaasunut ilaasoq.

Rektor Tine Pars

- Isumaqarpunga ataatsimeeqatigiinneq iluaqutaassasoq. Censoriusartut sapinngisamik amerlasuut katersorteriarlugit misilittakkanik paarlaasseqatigiilluni.

Margrethe Sørensen siunnersuummut tassunga qujavoq.

- Isumaqarpunga isumassarsiatsialassuusoq, Margrethe Sørensen oqarpoq.

Imminut ilinniarfigeqatigiissinnaapput

Taassuma piffissangaatsiaq atorlugu karaketeriliisarnini assigiinngitsut eqqarsaatigisarsimavai.

- Ikiortissaqannginnamalu eqqarsaatit nammineq aaqqittariaqartarsimavakka, Margrethe Sørensen oqarpoq. 

Aamma atuaruk Immikkoortortami pisortap ilinniartut piginnaasakippallaarsorai

Ajornarnerulersitsisumillu soraarummeernerni amerlasuuni danskit oqaasii atorneqartarput, ilinniartunullu amerlasuunut tamanna unammillernartuulluni. Taamaattumik soraarummeerutissat takuinnarlugit paasiuminatsinneqarsinnaasarput. Tamannalu Margrethe Sørensenip misilittagaqarfigivaa.

- Tassani oqaaseqatigiit danskisut eqqortumik allattariaqartarsimavakka, paasinnittariaaseq tunniussamut tunuliaqutaanersoq paasiniarlugu, Margrethe Sørensen oqarpoq.

Isummersuutit


 

Pages