CBS-imi lektori: Ilinniartitaaneq qaffassarneqartariaqarpoq

Kalaallit Nunaata aningaasarsiornera annaanneqassappat, nunallu tunisaasa ataatsimut nalingat qaffanneqassapata, Kalaallit Nunaanni inuussutissarsiornikkut politikki piorsaavigineqartariaqarpoq, ilinniartitaanerullu pitsaassusaa taassuma saniatigut qaffassarneqartariaqarluni.
Lise Lyck
novembarip 17-at 2014 10:17

Nunatsinni inuussutissarsiornikkut politikki piorsaavigineqarpat ilinniartitaanerullu pitsaassusaa qaffassarneqarpat, nunat tamalaat akornanni unammilleqatigiissinnaanissaq anguneqarsinnaassaaq, Copenhagen Businness Schoolimi lektori Lise Lyck oqarpoq.

- Aningaasaliisoqarnissaa pisariaqarpoq, inuussutissarsiutitigullu siunissami periarfissat aamma piorsarneqartariaqassallutik, lektori Lise Lyck oqarpoq.

Aamma atuaruk Naalakkersuisunngortussat aningaasaqarneq iluarsisariaqarpaat

Nunatsinni ilinniartitaanerup qaffassarneqarnissaa pisariaqassasoq, taassuma aamma oqaatigaa, ilinniartitaaneq nunanut allanut unammillersinnaasoq pilersinneqartariaqartoq oqaatigalugu.

- Kalaallit Nunaanni ilinniartitaaneq suli ima qaffasitsiginngilaq nunani allani annerusumik unammillersinnaalluni. Nunani allani ilinniariat amerlasuut uteqqinneq ajorput, tamannalu ilaatigut ajornartorsiutaavoq, Lise Lyck oqarpoq.