Cataloniap Spaniamit avissaarluni namminiilivinnissaanut sukataaruteqartoq Italiami politiinit tigusarineqartoq

Avissaarluni namminiilivinnissamut sukataaruteqartoq, Carles Puigdemont, Spaniamit unnerluutigineqarnissaanik inissinneqarusuttoq, politiinit tigusaavoq.
Carles Puigdemont, Cataloniap namminiilivinnissaanut Cataloniami innuttassunut inatsisinik unioqqutitsilluni 2017-imi taasititsisimasutut Spaniami unnerluutigineqarpoq. Assi © : Flickr/Chatham House
Allattoq Ritzau
septembarip 24-at 2021 09:23
Nutserisoq Mads Lynge

Spaniami nunap immikkoortuata Cataloniap Spaniamit avissaarluni namminiilivinnissaanut sukataaruteqartoq Carles Puigdemont Italiami politiinit tigusarineqarpoq.

Eqqartuussissuserisuata nutaarsiassaqartitsivimmut AFP-mut tamanna ippassaq sisamanngornermi unnukkut ilisimatitsissutigaa.

Puigdemont qeqertamut Sardiniamut tikikkami politiinit tigusarineqarpoq.

Politikeri Cataloniameersoq Europa-Parlamentimut ilaasortatut Italiami qeqertamut tassunga Belgiamit angalasimavoq. Puigdemont nammineq aalajangikkaminik Belgiami najugaqarpoq.

Puigdemont iperagaassanersoq, Spaniamulluunniit tunniunneqassanersoq Italiami eqqartuussiveqarfiup maanna aalajangissavaa.

Puigdemont, Cataloniap namminiilivinnissaanut Cataloniami innuttassunut inatsisinik unioqqutitsilluni 2017-imi taasititsisimasutut Spaniami unnerluutigineqarpoq.

Politikerit arlallit Cataloniap namminiilivinnissaanut sukataaruteqarsimasut ilaatigut ukiut 13-it angullugit parnaarussassanngortinneqarnikuupput.

Puigdemontip Belgiamit Spaniamut tunniunneqarnissaa Belgiami eqqartuussisumit 2020-mi itigartinneqarpoq, Puigdemontip Europa-Parlamentimut ilaasortatut unnerluutigineqarsinnaanngitsutut inissisimanera eqqartuussisup taamanikkut tunngavilersuutigaa.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk