Carsten Olsen GIF-imi generalsekretæritut tunuarniuteqartoq
Maanna generalsekretæriusoq, Carsten Olsen ukiuni arfineq-marlunni atuuffimmineereerluni nammineerluni soraarniuteqarpoq. Timersoqatigiillu Kattuffiata kusanartumik oqaaseqarfigaa.
- Carsten Olsen generalsekretæriunermini ilaatigut Kattuffiup ilusaanik allanngueqataavoq, GUX-imi timersorneq sammivigalugu ilinniarsinnaanermik pilersitseqataasuulluni, nunarput tamakkingajavillugu peqatigiiffinnik ineriartortitsinermut sammisutigut sungiusaasunik piginnaaninngorsaanernik pilersitsilluni maannalu aallartinnikuullugu 2020-imiit 2023-mut periusissanik pilersaarusiorneq, Timersoqatigiit Kattuffiata siulersuisuini siulittaasoq, Nuka Kleemann generalsekretæriujunnaartoq pillugu oqarpoq.
Carsten Olsenilli takorluukkanut Timersoqatigiit Kattuffiatalu takorluugaanik tassa nunatta 2030-mi nunarsuarmi timimik aalatitsiviulernissaanut nukinnik nutaanik peqalertarneranut piffissanngorsoraa.
- Siunissami generalsekretæriulersussamut suliassat soqutiginartut utaqqipput, Carsten Olsen oqarpoq.
Timersoqatigiit Kattuffiata siulersuisuini siulittaasup, Nuka Kleemannip Carsten Olsen maqaasissavaa:
- Periutsit allanngortiternerini peqataavoq isummersuutillu nutaat atorlugit aaqqissuussaanikkut nutaanngorsaaneq ingerlassimallugu maannalu tassa ukiuni aggersuni periusissatut pilersaarutit ingerlallugit. Tunniusimalluni sulisarnera aammalu sunniuteqarluartuunera maqaasissavara, Nuka Kleemann oqarpoq.
