Carla Sands, USA-p Danmarkimi aallartitaatut atorfeqarnermini Nuummi tikeraartoq.Assi: KNR

Carla Sands inatsimmik unioqqutitsisimasorineqartoq

Carla Sandsip Trump tapersorlugu demokratillu isornartorsiorlugit Tweetimi saqqummiisarsimanera inatsimmik unioqqutitsinerusoq, nakkutilliisoqarfik isumaqarpoq.

USA-p Danmarkimi ukiuni kingullerni sisamani aallartitaa, Carla Sands, atorfilittaanermi politikkimik suliaqaqqusaannginneq pillugu inatsimmik unioqqutitsisimasorineqarpoq.

Amerikamiut pisortatigoortumik nakkutilliisoqarfiata, U.S. Office of Special Counselip (OSC), USA-p præsidentianut Joe Bidenimut nalunaarutaani allaqqavoq. USA-mi nittartakkakkut tusagassiuut Politico taama allappoq.

Carla Sands, ilaatigut præsidentiusimasoq Donald Trump præsidentitut qinigaaqqinniassammat qineqqusaarnermut aningaaliinissamik amerikamiut qinersisartuinut USA-p Danmarkimi aallartitaqarfiata inoqatinut pisortatigoortumik attaveqaatiani, tassa Twitteriani kaammattuisimavoq.

AAMMA ATUARUK Carla Sands Pituffik pillugu suliaminut nersornaasigaasoq

Taamaaliornerlu Hatchimik taallugu atorfilittaanermi politikkimik suliaqaqqusaannginneq pillugu inatsimmik unioqqutitsineruvoq.

USA-mi atorfilittat - tamatumani aamma aallartitat - amerikamiutut innuttaassuseqartut tamarmik sulissullugillu politikikkut sumut attuumassuteqarnertik aallaaviginagu nalunaaruteqartartussaapput.

Carla Sandsip demokatit sinnerlugit præsidentinngorniunnikut Twitterimi arlaleriarluni isornartorsiortarsimavai. Joe Biden, Bernie Sanders, Kamala Harris Pete Buttigiegilu isornartorsiortarsimasaanut ilaapput.

Sands Trumpimut tapersersuisoqatigiit assigiinngitsut Twitterimi saqqummersitarpaaluinik aamma siammarterisarsimavoq.

Tweetimi saqqummiisarnini pillugu mianersoqquneqartarsimasoq

Carla Sandsip Hatchimik taallugu atorfilittaanermi politikkimik suliaqaqqusaannginneq pillugu inatsit ilisimasimallugulu, Tweetimi saqqummiisarnera inatsisinik unioqutitsinerusoq Washingtonimi atorfilittarpaalunnit inuttaanut qaammaterpaaluit ingerlanerini ataasiaannarani mianersoqqutigineqartarsimavoq.

Inatsisitigut misissuinernut inerniliussanullu isumaqataanatik, aallartitaasimasup eqqartuussissuserisui amerikamiut pisortatigoortumik nakkutilliisoqarfianut, OSC-mut, akissumminni allapput.

Sands USA-p Danmarkimi aallartitaatut januaarimi atorfeqarunnaarpoq, Pennsylvaniamilu maanna najugaqarluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat