Carl Egedep Aningaasaateqarfia aningaasanik tunisivoq

Inuit katillugit aqqanillit juullimi immikkut tunissutisippullusooq. Aalisartut piniartullu, taakkununngalu attuumassuteqarsinnaasut, aningaasanik tunineqassasut Carl Egedep Aningaasaateqarfiani siulersuisut akuersissutigisimavaat. Tunineqartussat persuarsiornertalimmik tamarmik immikkut 5.000 koruuninik kommunimi najugarisaminni tunineqassapput.

Aalisartut piniartullu ajunaarsimasut kinguliini tunineqartussaq tassaavoq Elionora Lukassen, Qeqertarsuup pigisaani Qeqertameersoq.

Aalisartutut piniartutullu inuutissarsiornermi maligassiuisutut tallimat tunineqassapput, ukuusut:

Aalisartoq piniartorlu Nikolai Augustusen, Sisimiut, aalisartoq Ludvig Olsen, Sisimiut, aalisartut piniartullu Hans Petersen aamma Gert Sandgreen, tamarmik Ilulissaneersut aamma aalisartoq piniartorlu Peter Davidsen, Nuuk.

Aalisartuni piniartunilu utoqqanngortuni tunineqartussat pingasut tassaapput, Peter Mikaelsen Qaqortoq, Petrus Jessen, Napasoq aamma Jakob Jeremiassen Qasigiannguit.

Taavalu aalisartunut piniartunullu nuliaallutik maligassiuilluartutut tunineqassapput:

Agnethe Petersen, Nuuk aamma Martha Jensen, Ilulissat pigisaannit Saqqameersoq.

Nersornaaserneqartut najukkaminni aalisartut piniartullu peqatigiiffiinit siunnersuutaapput.