Cancunimi isumaqatigiissut atsiorneqarpoq
Ataatsimeersuarnermi Bolivia kisiartaalluni atsiornissamut isumaqataanani pinaasertoq, isumaqatigiisitsiniap isumaqatigiittoqarnera naqissuserpaa.
- Atsioqatigiinneq nuannaarutigineqarpoq, ataatsimeersuarnermi nunat 193-it peqataapput, taakkunanngalu 192-it atsiornissamut isumaqataapput. Tassalu Bolivia kisiartaalluni atsiornissamut isumaqataanani.
Isumaqatigiinniutit arlaqarput, taakkulu inatsisitigut unioqqutinneqartussaajunnaarlugit aappaagumut isumaqatiginninniarnermut pisussamut, tassalu COP17-imut, aqqutissiuunneqarlutik.
Naak anguniagaq suli ungasikkaluaqisoq ajoriinnangassaanngitsoq qallunaat silap pissusaanut ministeriat Lykke Friis naliliivoq.
- Suli anguniagarput angunngilarput, aamma Mexicop præsidentia Philippe Calderoun taama oqarpoq. Isumaqatiginninniarnermi ajornartorsiuterpassuit isigisutut ippavut, isumaqatiginninniarnerlu unikkaluarluni. Maannali ingerlaqqinnissamut toqqammavissaqalerpugut, tamannalu atorluartariaqarparput, Lykke Friis DR-imut oqarpoq.
Cancunimi isumaqatigiinniarnermi atsioqatigiinnerup inerniliussaa qiviaraanni, taanna pivusunik isumaqatigiissutinik imaqarpoq.
Naalagaaffiit Peqatigiit isumaqatigiissutigaat aningaasaateqarfimmik pilersitsinissaq. Tassalu nunanit pisuunit, ukiumut 100 milliard dollarsit agguarlugit, nunanut piitsunut tunissutigineqartassasut isumaqatigiissutaalluni, USA aamma Japan tunissuteqarnerpaasassapput. Taamatullu aaqqiineq 2020-miit atuutilissaaq.
Nunarsuatsinni orpippassuaqarfiit nungusagaajunnaarsinniarlugit suliniarneq aallartissasoq aamma isumaqatigiissutigineqarpoq, nunat ineriartortut tamatumunnga pilersaarusiornissaat isumaqatigiissutaalluni.
Isumaqatigiinniutit arlallit anguneqanngillat, ilaatigut Kyotomi isumaqatigiissut 2012-mut killeqartinneqartoq sivitsorneqanngitsoorpoq, taassuma isumaqatigiinniutigineqarnissaa aappaagumut kinguartinneqarluni. Silap pissusaa pillugu isumaqatigiinniarneq tulleq pissaaq Sydafrikami.
