Canadap USAllu issittumi sakkutooqarnikkut sungiusarneq naammasseqqammerpaat
Issittup ilaani Canadami sakkutooqarnikkut upalungaarsimanissaq maanna pisariaqarnerulersimavoq, Rusland Ukrainimi Issittumilu sakkutooqarnikkut qunusaarilermat.
Canadali eqqarsaatigalugu sakkutooqarnikkut atortutigut, annaassiniarnermilu upalungaarsimassutinik atortoqarnikkut suli kinguarsimaqaaq.
Canadalli maannamut issittumi sakkutooqarnikkut sungiusarneq aatsaat taama annertutigisoq naamasseqqammerpaa.
Sungiusarneq atserneqarsimasoq Nunalivut, qaammammik ataatsimik sivisussusilik aprilip aallartinneraniit majip aallartinneranut ingerlanneqarsimavoq.
Sungiusarnerit USA peqatigalugu ingerlanneqartut Nunavumiittoq Qaasuitsoq qitiutillugu ingerlanneqarsimapput, Canadallu issittortaata affaatut angitigisumi ingerlanneqarsimalluni. Sungiusarnerni sakkutuut umiartortut, timmisartortartut nunamiittullu peqataatinneqarput.
Nunavumi naalakkersuisut Inuit illersorneqarnerannut pingaarutilimmik peqataapput, sungiusarnernummi Inuit Rangers peqataapput.
Inuit Rangers tassaapput sakkutuujunngitsut, inoqarfinni amerlanerpaani illersuisutut taaneqarsinnaasut, naggueqatitsinnillu inuttaqartut. Tamakku sakkutuutulli ukiumoortumik sungiusarnerni peqataasarput.
