Canadap nunat inoqqaavisa pisinnaatitaaffii akuerai
Naalagaaffiit Peqatigiit Nunat Inoqqaavi pillugu Ataavartumik ataatsimiititaliaata tamanna ukiorpassuarni utaqqisimavaa.
Canadami nunap inoqqaavinut ministerip Carolyn Bennettip, Nunat inoqqaavisa pisinnaatitaaffii pillugit Naalagaaffiit Peqatigiit nalunaarutaat tamakkiisumik Canadami tunngaviusumik inatsisimmi killiliussat iluanni tamakkiisumik atuutilersinneqassasoq Naalagaaffiit Peqatigiit Nunat Inoqqaavi pillugu Ataavartumik ataatsimiititaliaanni ippassaq pingasunngornermi nalunaarutigaa.
Canadami nunap inoqqaavinut naggueqatigiinnut Inunnut, indianerinut metisinullu tamanna oqaluttuarisaanikkut pingaaruteqarlunilu allannguiffiussaaq.
Aamma atuaruk Ataavartumik Ataatsimiititaliami ukiumoortumik ataatsimiinneq aallartittoq
Nalunaarummi inuunerminni sunut tamanut attuumassuteqarpoq, aatsitassarsiornermit ilinniagaqarsinnaanermut, peqqinnissamut tunngasunut, namminersorsinnaanermut allarpassuarnullu.
Nalunaarummili aamma nunat inoqqaavi ilisimasanik toqqammaveqarluartumik akuersissuteqartarnissaat qularnaveeqquserneqarpoq, tassalu akuersisinnaatitaallutillu itigartitsisinnaatitaalissapput, ilaatigut suliniutinut avatangiisinut sunniuteqarsinnaasunut tunngatillugu.
Carolyn Bennettip oqalugiaatimini naatsumi kimittuumilu, ukiorpassuarni ilungersuuteqarsimanerup inerneratut tamanna taavaa, Canadamilu nunap inoqqaavisa siunissami qanoq pineqartarnissaannut tunngaviusumik allannguutinik kinguneqartussaanerarlugu.
Aamma atuaruk Nunat inoqqaavisa siunnersuisoqatigiiffiat ataatsimiilerpoq
Canada taamaalilluni nunarsuarmi nunani Bolivia kisiat peqatigalugu nalunaarut atuutilersittussanngorpaa.
Carolyn Bennettip oqalugiaataa najuuttunit Ataavartumik ataatsimiititaliap oqaluttuarisaanerani aatsaat taama sivisutigisumik ersaartaassutigineqarpoq.
Indianerit høvdingiata Kahanawakemeersup, Kenneth Deerip, KNR-imut oqaatigaa ministerip ippassaq marlunngornermi nalunaarutigisaa naatsorsuutigisamit annertunerujussuusoq Canadallu oqaluttuarisaanerani kapitalimik nutaarluinnarmik aallartitsiffiussasoq.
Aamma atuaruk Inuit pisinnaatitaaffii Canadami oqaluuserineqartussanngorput
Aqqaluk Lynge, Ataavartumik ataatsimiititaliami siornatigut ilaasortaasimasoq, nalunaarummillu ukiorpassuarni suliaqataasimasoq KNR-imut oqarpoq ministerip oqalugiaataa killitsissutigingaarsimallugu.
Caroly Bennettip oqalugiaatini naggaserlugu Canadami høvdingit ilaat issuarpaa, oqarluni qajariaq nunasiaanerup nalaani kinngusimasoq, maannali qajariaq makiteqqinneqartussanngortoq Canadamilu nunap inoqqaavisa pitsaanerusumik siunnissaannut aallartoqartussanngortoq.