Canadap nunanut allanut ministeria tunuartoq

Danmarkimiit, Norgemiit, Ruslandimiillu, nunanut allanut ministerit Ilulissani ataatsimeersuarnermut, Arctic Ocean Conference-mut peqataasut, Canadami nunanut allanut ministeri pinnagu Nunap pisuussutaanut ministerip, Gary Lunnip peqataatinneqarnissaa tupigusuutigineqarpoq.

Ilulissani ataatsimiinnissap naalagaaffinnut pingaaruteqarnera pissutigalugu Canadamiut tusagassiuutitigut nunanut allanut ministerip ilaatinneqarniannginnera sapaatip akunnerata kingulliup ingerlanerani isornartorsiorpaat.

Nunanulli allanut ministerip Ilulissani peqataasussanut ilaatinneqartussatut nalunaarutigineqarsimannginnera ippassaq peqqutissarsineqarpoq, tassami Maxime Bernier ministeriunermut, Stephen Harperimut ippassaq ingerlaannaq atuutilersussamik tunuarniuteqarpoq.

Tunuarniuteqarnerminut pissutigaa allakkat

isertugaataasunik imallit illoqarfimmi arnaatiminut

qimattoorsimaneri, taamaalilluni Canadap

naalagaaffittut isumannaatsuunera

ulorianartorsiortissimallugu.

Ministeriujunnaartulli allakkanik qimatsisoorsimanera,

allanut nuanninngitsunut ministerimut

isornartorsiutigineqartunut ilaaginnarpoq.

Ungasinngitsukkut ministeri Afghanistanimiitilluni Khandaharimi guvernøri ajuallatsikkamiuk qaammatini arlalinni naalakkersuinikkut najummassimanartorsiortoqaleraluarpoq.

Maxime Bernier minnerusumik isornartorsiorneqalinngilaq paasineqarmat, pinerlunniaqatigiinnut attuumasuteqarsinnaasumik arnaateqalersimasoq.

Tassa allakkat naalakkersuinermut tunngassuteqartut isertuussassat qimattoorsimanerat maanna utoqqatsissutigineqaannarunarpoq. Ilulissanilu ataatsimeersuarnermi taamaalilluni Nunap pisuussutaanut ministerip Canadamiunut sinniisuutinneqarnissaa naammagiinnartariaqarpaat.