Canadap issittup imartaa pilerigivaa

Imartaq Qalasersuup nalaaniit Ruslandip tungaanukartoq, Canadamit misissuiffigineqassanersoq, Canadami oqartussaasut suli aalajaginngikkaat, pisuussutit Canadap kangimut sineriaaniit pisut pillugit pisortaqarfimmi pisortap Jacob Verhoefip, tamanna aviisimut The Vancouver Sun-imut, oqaatigaa.

Taamaaliortoqassappat Ruslandip Danmarkillu piumasaqaataannut aamma kalluisinnaassaaq, Ruslandimiummi imartamik pineqartumik namminneq misissuereerput, imartamik piginnittuunertik takutikkumallugu.

Immap iluani quassuk Lomonosov-ip quassuatut taaneqartartoq, Qalasersuup Avannarliup eqqaaniittoq, pillugu saqitsaattoqalersinnaanera aarleqqutigineqalersinnaavoq.

Canadamiut misissuereerlutik oqarput quassuk Lomonosov amerikap nunavittaaniit pisoq. Akerlianilli russit oqarput, quassuk Lomonosov Ruslandip nunavittaaniit pisuusoq.