Canadap issittortaani universitetiliulerput
Canada maanna nunani issittuni kisiartaalluni, issiittumi universiteteqanngilaq. Suleqatigiissitaq pilersinneqaqqammersoq, sapaatip akunnerani matumani Yellowknifemi siullermeerluni ataatsimeeqqammerpoq, taakkulu issittumi universitetilornissaq pilersaarusiortussaavaat.
Nunani issittuni allani arfineq marluusuni, nunat avannarpasinnerusuini 52-inik universiteteqarpoq, oqaatigineqareersutulli Canadami soqanngilaq.
Sarah Wright-Cardinalip, Aurora College-mi rektoriusup CBC Newsimut oqaatigaa, issittumi oqaasissaqarneq, silap pissusaata allanngoriartornera aamma nunap inoqqaavisa ilisimasaat ilisimatusarfigissagaanni, tamanna naalagaaffiup avannaani pisariaqartoq. Inuit issittumi najugallit ilisimatusarfiginerisigut qanoq ilikkagaqartoqartigisinnaanera, inuit nalusarpaat, Sarah Wright-Cardinal oqarpoq, erseqqissarlugulu tamaani najugallit ilisimasanik ingerlatitseqqittarnerat nalissaqanngitsoq.
Canadami issittumi universitetiliornissaq siornatigut ukiut 25-t qaangiuppata pisinnaasutut oqaatigineqartaraluarpoq, maannali tamassuma siusinnerujussuakkut pinissaa misilinniarneqalerluni. Universitetiliariniarneqartoq sumiiffimmi ataasiinnarmiissanngilaq, illoqarfinnili assigiinngitsuni immikkoortortaqassalluni, tamatumalu peqatigisaanik nunaqarfimmiut internetikkut atuartinniarneqarlutik.
