Canadap issittortaani qaammatip ataatsip ingerlanerani politiit marluk toqutaapput

Politeeq Kimmiruk-mut, nunaqarfimmut Qeqertaalummiittumut 400-nik inulimmut, aalakoorluni biilertumik nalunaaruteqartoqarmat orniguppoq – tassani eqqaassisoqalerpoq politiillu aallaaneqarnini toqqutigigaa, Canadami tusagassiorfiit arlallit taama allaaserisaqarput.

Taamaalilluni qammatip ataatsip ingerlanerani Canadap issittortaani aappassaanik politiimik toqutsisoqarpoq – tamannalu politiit suleriaasiata allanngortinneqarneranik kinguneqarsinnaavoq. Tassami Canadap issittortaani nalinginnaasuuvoq politiit kisimiitillugit suliassanut ornigutsinneqartarnerat. Tamanna qangali allanngortinneqarusuttaraluarpoq – inuttassaaleqinerli pissutigalugu iliuuseqarfigineqassanani, maannali allanngortinneqassagunarpoq, taamaalilluni politiit kisimiitillugit sulisinneqassaassallutik.

Aamma Canadap issittortaani politiit inuusuttut atorneqartorujussuupput – taakkua politiinngorniarfimmiit inuiaqatigiinnut matoqqasunut sulisussanngortinneqartarput. Politiit pisortaasa tamanna ajoriffissaqartinngilaat, tassami politiinngorniarfiup politiinngorniat taamatut sulinissamut ilinniartittarmatigik – tamannali politiit peqatigiiffiata allanngortikkusuppaa.

Angut politiimik toqutsisutut pasineqartoq aqaguani nammineerluni saaffiginnippoq, maannalu Iqalunni parnaarussivimmi tigummineqarluni.