Canadap issittortaani aningaasaqarneq qineqqusaarutigaat
Canadap avannarpasinnerusortaani aningaasaqarniarnerup pitsanngorsaavigineqarnissaa, Canadami ministeriunerup Stephen Harperip qineqqusaarnermini neriorsuutigaa.
Immikkut ittumik sullissiviliornikkut tamanna anguniarneqarpoq.
Nittartakkami Canada.com-imi tamanna atuarneqarsinnaavoq.
Sullissiviit taamaattut pioreerput, tassami nunap immikkoortuini Atlantikumut sinerialinni, nunap immikkoortuini Canadap kippasinnerusortaaniittuni kiisalu Québecimi aningaasaqarniarnerup pitsanngorsaaviginiarneqarnissaa sulissutigineqarmat.
Sullissiviit pineqartut aningaasat 1,5 milliardit koruunit missaanniittut ukiumut kaaviiaartittarpaat, aningaasaliinikkut taarsigassarsisitsinikkullu aningaasaliisoqartarmat.
Sullissivik immikkut ittoq immikkut ittumik aningaasaliivigineqartariaqanngitsoq, Stephen Harperip oqaatigaa, aningaasat allatigut nassaarineqarsinnaanerat tikkuarlugu.
