Canadap Frankrigillu nunatsinnut attaveqarnertik pitsanngorsarniarlugu konsuuleqarfiit ammaanersioraat

Frankrigip Canadallu kalaallit qaninnerulerumallugit Issittumilu najuunnerulerumallutik, Nuummi konsuuleqarfitik tallimanngornermi ammaanersiussavaat.

Canadap nunanut allanut ministeria, Anita Anand, tikittussat ilaat, Canadap konsuuleqarfissaata ammaanersiorneqarnera malunnartinniarlugu Nuummukassaaq.

Sermitsiap nutaarsiassiinera naapertorlugu, nunanut allanut ministerip tikeraarnermini nunanut allanut naalakkersuisoq Vivian Motzfeldt (S) ataatsimeeqatigissavaa.

Anita Anandip Danmarkip nunanut allanut ministeria Lars Løkke Rasmussen (M) sisamanngornermi ataatsimeeqatigaa.

Kalaallit Nunaannut angalaqatigiissallutik Lars Løkkep Instagramimi sisamanngornermi unnukkut paasissutissiissutigivaa.

Tuluit kunngiata Canadami sinniisaa, guvernøri Mary Simon, konsuuleqarfiup pisortatigoortumik ammaanersiorneqarnerani aamma peqataassaaq.

Aammattaaq Naalakkersuisut siulittaasuat Jens-Frederik Nielsen (D) ataatsimeeqatigissavaa.

Qaninnerujumallusi

Frankrigip konsuuleqarfittaarnissamik pilersaarutai præsident Emmanuel Macronimit  Kalaallit Nunaannut siorna juunimi tikeraarnerup nalaani saqqummiunneqarput.

Frankrigip kalaallit inuiannut qaninnerulerumalluni anguniakkaminik erseqqissaanera taamani oqaatigaa.

- Ilissinnut qaninnerujumalluta illersorumallusilu Nuummi generalkonsulateqalerniarluta aalajangerpugut, Macron oqarpoq.

Præsident Donald Trumpip Kalaallit Nunaannik tiguaaniarluni oqariartuuteqaqqittarnerata kingunerisaanik Danmarkip, USA-p Kalaallit Nunaatalu akornanni ajornartorsiut sakkortusivoq.

Nunanut allanut ministerip Jean-Noël Barrotip Frankrigip konsuuleqarfiata ulloq ammarneqarfissaa januaarimi saqqummiuppaa.

Nunanut allanut ministerip USA Kalaallit Nunaannik tatisiunnaartariaqarnera tamatumunnga atatillugu naqissuserpaa.

- Natomut ilaasortaasumik allamik saassussineq isumassaqanngilaq. Tamanna USA-p soqutigisaanut akerliussaaq, Jean-Noël Barrot oqarpoq.

Lars Løkkep Vivian Motzfeldtillu USA-mi præsidentip tulllersortaa J.D. Vance nunanullu allanut ministeri Marco Rubio USA-mi ulloq taanna ataatsimeeqatigaat.

/ritzau/