Canadap eqqaani raajartassiissutit aalisarneqareerput

- Canadami aalisarnermut ministeri qanittukkut allafigaara, illuinnaasiortutut alloriarnera ajuusaarutigalugu, ajornartorsiulli aaqqinneqarnissaa siunertaralugu naapinnissaa ammaffigigiga aamma oqaatigaara, Ane Hansen oqarpoq.

Taamatut aaqqiagiinngissuteqarneq qangali aallartereermat Ane Hansenip eqqarsarnartoqartippaa Canadamit taama qisuariartoqarmat, aaqqiissuteqartoqarnissarlu pillugu Gail Sheamut allagaqarsimanerarluni:

- Pimoorullugu aaqqiiniartariaqartugut saaffiginninninni ilaatigut oqaatigaara, illuinnaasiortumillu Canadap iliuuseqarnerarlugu. Imartarmi pineqartoq nunat tamalaat imartarivaat, nunallu NAFO-mi ilaasortat susassaqarfigalugu, taamaammat NAFO-p ukiumoortumik ataatsimiinnerani aaqqiisoqarnissaa pillugu oqaluuserineqartariaqartoq isumaqarpugut, Aalisarnermut naalakkersuisoq Ane Hansen oqarpoq.

Atlantikup Avannaata Kitaani Aalisarneq Pillugu Suleqatigiiffimmi NAFO-mi ilaasortaasut allat, canadamiut isumaqatigaat oqarlutik, kalaallit savalimmiullu raajartarisartagaat amerlavallaartut, ilisimatusarnermullu isummersuutinut naleqqutinngilluinnartut.

Danmark Kalaallit Nunaat Savalimmiormiullu sinnerlugit pisassiissutit pillugit isumaqatigiinniartarpoq, Gail Shealu oqarpoq Danmark Kalaallit Nunaat Savalimmiullu sinnerlugit illuinnaasiorluni raajartassiisimasoq, NAFO-p siunnersuutigisaanit quleriaammik amerlanerusunik raajartassiisimanerarlugu.

Canadami talittarfiit kalaallinut savalimmiormiunullu siornatigut matuneqarnikuupput.

Tamanna 2004-mi decembarimi pivoq, 2008-mili ammaqqinneqarlutik.