Canadap avannaarsuani sakkutuunut umiarsualiviliornialerput
Canadap avannaarsuani sakkutooqarnerup ukiuni tulliuttuni annertusineqarnissaa pilersaarutaavoq.
Pilersaarutinut ilavoq sakkutuut umiarsuaasa talittarfissaannik arfineq-marlunnik sanaartornissaq, taakkualu arlallit Nunavummi soorlu Iqaluit eqqaanni sanaartorneqassapput. North West Territories sanaartorfiusussanut ilanngunneqarusulerpoq.
Tassani premierministeri, Joe Handley, siunnersuuteqarpoq Tuktoyaktuk-mi umiarsualiveqarfiusumi aamma sakkutuunut talittarfiliortoqassasoq, CBC oqaluttuarpoq.
Tuktoyaktuk-mi sakkutuunut talittarfiliisoqarnikkut, aningaasarsiornerup ilorraap tungaanut ingerlalersinnaanera Premierministerip siunnersuuteqarnerminut pissutaatippaa.
Siornatigut issittumi sakkutuut naalagarisimasaat Leblanc allarujussuarmik siunnersuuteqarpoq. Taana isumaqarpoq Cornwallis-p qeqertaani Resolute Bay-mi sakkutooqarfiliortoqarpat nakkutilliinissamut pitsaanerussasoq. Sakkutooqarfiit sumiissanersut ukiup ingerlanerani Canadami naalakkersuisut aalajangertussaavaat.
